سکیورٹی فورسز نے بنوں میں انٹیلی جنس اطلاعات کی بنیاد پر آپریشن کرتے ہوئے 22 خوارج کو ہلاک کردیا۔ آئی ایس پی آر کے مطابق، آپریشن فتنہ الخوارج کی موجودگی کی مصدقہ اطلاع پر کیا گیا، جس میں سکیورٹی فورسز نے دہشت گردوں کے ٹھکانوں کو مؤثر انداز میں نشانہ بنایا۔ شدید فائرنگ کے تبادلے کے دوران 22 دہشت گرد ہلاک ہوئے۔
بیان میں کہا گیا ہے کہ علاقے میں بھارتی سرپرستی یافتہ خوارج کی مزید تلاش کے لیے کلیئرنس آپریشن جاری ہے۔
آئی ایس پی آر نے بتایا کہ عزمِ استحکام کے تحت دہشت گردی کے مکمل خاتمے تک کارروائیاں جاری رہیں گی۔ سکیورٹی فورسز اور قانون نافذ کرنے والے ادارے دشمن کے نیٹ ورکس کے خاتمے کے لیے پُرعزم ہیں۔
ترجمان نے مزید کہا کہ غیر ملکی سرپرستی اور پشت پناہی سے چلنے والی دہشت گردی کا مکمل صفایا کرنا بنیادی ہدف ہے۔
وزیراعظم شہباز شریف نے بنوں میں فتنتہ الخوارج کے خلاف کامیاب کارروائی پر سکیورٹی فورسز کو خراج تحسین پیش کرتے ہوئے کہا ہے کہ 22 دہشتگردوں کو ہلاک سکیورٹی فورسز نے بڑی کامیابی حاصل کی۔
انہوں نے کہا کہ پوری قوم دہشتگردی کے خلاف جنگ میں افواج کے ساتھ کھڑی ہے، ملک سے ہر قسم کی دہشتگردی کے مکمل خاتمے کے لیے پُرعزم ہیں۔
