خیبرپختونخوا میں الیکٹرک گاڑیوں کی بڑھتی ہوئی مانگ کے پیش نظر صوبائی حکومت نے جدید چارجنگ اسٹیشنز قائم کرنے کا فیصلہ کر لیا ہے۔ ذرائع کے مطابق منصوبے کو حتمی شکل دے دی گئی ہے اور موٹروے اور بڑے شہروں میں عالمی معیار کے چارجنگ پوائنٹس قائم کیے جائیں گے۔
ابتدائی مرحلے میں ایم ون موٹروے پر پشاور، نوشہرہ اور ایبٹ آباد میں جدید چارجنگ اسٹیشنز تعمیر کیے جائیں گے۔
منصوبے کے تحت چین کی نجی کمپنیاں خیبرپختونخوا میں سرمایہ کاری میں دلچسپی لے رہی ہیں، جبکہ مقامی سرمایہ کاروں کو بھی شراکت داری کی پیشکش کی گئی ہے۔
ذرائع کا کہنا ہے کہ صوبے کے بڑے بزنس گروپس نے چینی کمپنیوں سے باقاعدہ رابطے شروع کر دیے ہیں۔
وزارت توانائی نے منصوبے کے انتظامی امور کو حتمی شکل دینے کے لیے ایک ورکنگ گروپ بھی تشکیل دے دیا ہے۔
منصوبہ مکمل ہونے کے بعد خیبرپختونخوا ملک کا پہلا صوبہ ہوگا جہاں اس نوعیت کے جدید اور عالمی معیار کے چارجنگ اسٹیشنز قائم ہوں گے۔
