آزاد حکومت ریاست جموں و کشمیر نے نوجوانوں کے لیے بلاسود قرضہ اسکیم کی منظوری دے دی ہے، جس کے تحت ایک لاکھ سے 20 لاکھ روپے تک کے قرضے فراہم کیے جائیں گے۔ یہ سہولت 18 سے 40 سال کے مرد، خواتین اور خواجہ سرا نوجوانوں کو دی جائے گی جو ریاست کے باشندے ہوں اور کاروبار شروع کرنے میں دلچسپی رکھتے ہوں۔
وزیراعظم آزادکشمیر فیصل ممتاز راٹھور کی منظوری کے بعد محکمہ سمال انڈسٹریز کارپوریشن نے باضابطہ اشتہار جاری کر دیا ہے۔
قرضہ فارم محکمہ کی آفیشل ویب سائٹ سے ڈاؤن لوڈ کیے جا سکتے ہیں اور انہیں 20 جنوری تک جمع کرانا ہوگا۔
محکمہ کے مطابق ہنر مند اور اعلیٰ تعلیم یافتہ نوجوانوں کو قرضوں میں ترجیح دی جائے گی، اور قرضے آبادی کے تناسب سے تقسیم کیے جائیں گے۔
قرضوں پر کوئی سود نہیں لیا جائے گا، جبکہ سود کی ادائیگی آزادکشمیر حکومت خود کرے گی۔
اس اسکیم کے تحت قرضے بینک آف آزاد جموں و کشمیر کے تعاون سے جاری کیے جائیں گے۔
حکومت کا کہنا ہے کہ اس اقدام کا مقصد نوجوانوں کو کاروباری مواقع فراہم کرنا اور ریاست میں معاشی خود کفالت کو فروغ دینا ہے۔
