وزیرِ اعظم شہباز شریف نے کہا ہے کہ ایشیائی ترقیاتی بینک (اے ڈی بی) پاکستان کی ترقی اور خوش حالی کے سفر میں ہمیشہ ایک قابلِ اعتماد اور مستحکم شراکت دار ثابت ہوا ہے۔ انہوں نے اس بات پر زور دیا کہ بینک کے تعاون سے مختلف ترقیاتی منصوبے ملک میں معاشی استحکام، انفراسٹرکچر کی بہتری، تعلیم اور صحت کے شعبوں میں اہم کردار ادا کر رہے ہیں۔ وزیرِ اعظم نے کہا کہ حکومت پاکستان ایشیائی ترقیاتی بینک کے ساتھ اپنی شراکت داری کو مزید مضبوط بنانے اور ملک میں ترقیاتی پروگراموں کی رفتار کو تیز کرنے کے لیے پرعزم ہے، تاکہ عوام کو بہتر سہولیات اور مستحکم معاشی ماحول فراہم کیا جا سکے۔
یہ بات انہوں نے اے ڈی بی کے صدر کساٹو کانڈا کی وفد کے ہمراہ ملاقات کے موقع پر کہی ہے۔
ملاقات میں وفاقی وزراء احد چیمہ،محمد اورنگزیب، اویس لغاری، حنیف عباسی، وزیر مملکت برائے خزانہ و ریلوے بلال اظہر کیانی اور متعلقہ حکام شریک ہوئے۔
وزیرِ اعظم شہباز شریف نے اے ڈی بی کے صدر سے کہا کہ خوش آئند ہے کہ اے ڈی بی پاکستان کے کئی بڑے منصوبوں میں شراکت داری میں دلچسپی رکھتا ہے۔
انہوں نے کہا کہ ریلوے، پبلک ٹرانسپورٹ اور معدنیات کے شعبوں میں پاکستان اور اے ڈی بی شراکت داری آگے لے جاسکتے ہیں۔
اے ڈی بی کے ساتھ شراکت داری پاکستان کی معیشت کے لیے انتہائی مفید ثابت ہو گی۔
وزیرِ اعظم شہباز شریف نے اے ڈی بی کے وفد کو حکومت کی جانب سے متعارف کرائی گئی اصلاحات سے آگاہ کیا۔
اس موقع پر صدر اے ڈی بی نے جامع اصلاحات کرنے پر حکومتِ پاکستان کی تعریف کی۔
اے ڈی بی کےصدر نے انفرااسٹرکچر، ماحولیاتی تبدیلی اور ادارہ جاتی اصلاحات میں تعاون بڑھانے کے عزم کا اعادہ بھی کیا۔
