بلوچستان کے ضلع مستونگ میں سیکیورٹی فورسز کے ایک کامیاب آپریشن میں بھارتی سرپرستی یافتہ چار دہشت گرد ہلاک کر دیے گئے۔
پاک فوج کے شعبہ تعلقات عامہ (آئی ایس پی آر) کے مطابق انٹیلی جنس معلومات کی بنیاد پر کیے گئے اس آپریشن میں دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد ہوا ہے۔ بتایا گیا ہے کہ یہ دہشت گرد بھارتی پراکسی گروپ 'فتنۃ الہندوستان' سے تعلق رکھتے تھے اور علاقے میں مختلف دہشت گرد سرگرمیوں میں ملوث تھے۔
سیکیورٹی فورسز نے علاقے میں کلیئرنس آپریشن جاری رکھا ہوا ہے تاکہ کسی بھی باقی دہشت گرد کو مکمل طور پر ختم کیا جا سکے۔ آئی ایس پی آر نے کہا ہے کہ ملک کی سیکیورٹی فورسز بھارتی سرپرستی یافتہ دہشت گردی کو جڑ سے اکھاڑ پھینکنے کے لیے پرعزم ہیں اور دہشت گردوں کو قانون کے کٹہرے میں لائیں گے۔
یاد رہے کہ گذشتہ دنوں خیبر پختونخوا کے مختلف اضلاع میں بھی بھارتی حمایت یافتہ 19 دہشت گردوں کو ہلاک کیا گیا تھا، جن میں سے 14 مہمند کے علاقے گلونو میں اور 4 شمالی وزیرستان کے دتہ خیل میں سیکیورٹی فورسز نے کارروائی کرکے مار گرائے تھے۔
