شہر قائد میں دالوں، چاول اور مصالحہ جات کی ہول سیل اور ریٹیل سطح پر نئی سرکاری قیمتیں مقرر کر دی گئی ہیں۔
کمشنر کراچی سہیل راجپوت نے قیمتوں کا باضابطہ نوٹیفکیشن جاری کرتے ہوئے ہدایت کی ہے کہ ہول سیلرز، ریٹیلرز اور ڈیپارٹمنٹل اسٹورز نمایاں جگہ پر سرکاری قیمت نامہ آویزاں کریں۔
کمشنر کراچی نے اپنے حکم نامے میں واضح کیا ہے کہ دکانداروں کی جانب سے سرکاری نرخوں کی خلاف ورزی کی صورت میں سخت قانونی کارروائی عمل میں لائی جائے گی۔
ان کا کہنا ہے کہ نئی قیمتیں سندھ ایسنشل کموڈیٹیز ایکٹ کے تحت مقرر کی گئی ہیں جو فوری طور پر نافذ العمل ہوں گی اور آئندہ احکامات تک برقرار رہیں گی۔
جاری کردہ فہرست کے مطابق دال ماش کی قیمت 335 روپے فی کلو، دال مونگ 340 روپے فی کلو، دال مسور 200 روپے فی کلو اور دال چنا 200 روپے فی کلو مقرر کی گئی ہے۔
اسی طرح کابلی چنا 295 روپے اور کالا چنا 190 روپے فی کلو فروخت کیا جائے گا۔
مصالحہ جات کی قیمتوں میں پسی ہوئی مرچ 750 روپے جبکہ ثابت ہائبرڈ مرچ 560 روپے فی کلو مقرر کی گئی ہے۔
اس کے علاوہ ثابت دھنیا 430 روپے، پسا ہوا دھنیا 480 روپے فی کلو، پسی ہلدی 590 روپے اور ثابت ہلدی 535 روپے فی کلو کی سرکاری قیمت مقرر کی گئی ہے۔
کمشنر کراچی نے کہا ہے کہ عوام کو ریلیف فراہم کرنے اور ناجائز منافع خوری کی روک تھام کے لیے قیمتوں پر سختی سے عملدرآمد یقینی بنایا جائے گا، جبکہ متعلقہ حکام کو مارکیٹوں کی مسلسل نگرانی کی ہدایت بھی جاری کر دی گئی ہے۔
