سعودیہ عرب کے شہر جدہ میں کلاؤڈ برسٹ اور شدید بارشوں نے نظام زندگی مفلوج کردیا، جہاں مختلف حادثات میں دو افراد جاں بحق، جب کہ متعدد کے زخمی ہونے کی اطلاعات ہیں۔
سعودی سرکاری ایجنسی کے مطابق ساحلی شہر جدہ سمیت مغربی علاقوں میں شدید بارشوں کا سلسلہ جاری ہے، جہاں گزشتہ روز جمعرات 24 نومبر کو ہونے والی طوفانی بارش اور کلاؤڈ برسٹ سے کے دوران مختلف حادثات میں دو افراد جاں بحق ہوئے۔ بارشوں کے سبب سڑکیں دریاؤں کا منظر پیش کر رہی ہیں، جب کہ ابتر صورت حال کے باعث تعلیمی ادارے بند کردیئے گئے ہیں۔
شدید بارشوں سے شہر کا فلائٹ آپریشن بھی متاثر ہوا ہے۔ سوشل میڈیا پر جاری ٹوئٹس کے مطابق جدہ میں 10 گھنٹوں کے دوران 246 ملی میٹر بارش ریکارڈ کی گئی ہے۔
Please pray for #jeddah pic.twitter.com/ujtndTekmg
— غانم الدوسري (@GhanemAlmasarir) November 24, 2022
مکہ ریجنل گورنمنٹ نے اپنے ٹوئٹر پیج پر بتایا ہے کہ اب تک دو اموات ریکارڈ کی گئی ہیں اور ہم تمام افراد سے مطالبہ کرتے ہیں کہ جب تک انتہائی ضرورت ہو، اس وقت تک وہ گھروں سے باہر نہ نکلیں۔
مکہ ریجن میں 40لاکھ نفوس پر مشتمل ملک کے دوسرے بڑے شہر جدہ کے ساتھ ساتھ اسلام کا سب سے مقدس شہر مکہ بھی شامل ہے جہاں ہر سال لاکھوں فرزندان اسلام حج اورعمرہ کی ادائیگی کے لیے آتے ہیں۔ ان دونوں شہروں کو ملانے والی سڑک کو زائرین ملہ پہنچنے کے لیے استعمال کرتے ہیں لیکن بارش کے سبب اس سڑک کو بند کردیا گیا ہے تاہم بارش رکنے کے بعد اسے بعد میں کھول دیا گیا تھا۔
ریاستی ادارے الاخباریہ چینل کی فوٹیج میں عبادت گزاروں کو مسجد الحرام میں شدید بارش کے دوران بھی عبادت کرتے دیکھا جا سکتا ہے۔ جدہ میں شدید بارش کے نتیجے میں پیدا ہونے والی صورتحال کی ویڈیوز سوشل میڈیا پر وائرل ہو رہی ہیں جس میں پانی کو گھروں میں داخل ہوتے اور گاڑیوں کو ڈوبتے دیکھا جا سکتا ہے۔
جدہ کے شاہ عبدالعزیز انٹرنیشنل ایئرپورٹ نے کہا کہ موسمی حالات کے پیش نظر کچھ فلائٹس کی روانگی ملتوی کردی گئی ہے اور مسافروں کو مشورہ دیا کہ وہ فلائٹ شیڈول کے لیے اپنی پروازوں سے رابطے میں رہیں۔
Announcement:
— Haramain Sharifain (@hsharifain) November 24, 2022
The Makkah-Jeddah Highway has been temporarily closed due to heavy rain and accumulation of Rain water
سعودی پریس ایجنسی نے رپورٹ کیا کہ پورے دن بارش کی پیش گوئی بارش کے سبب جدہ میں وقتی طور پر اسکولوں کو بند کردیا گیا ہے۔
طلبہ کی حفاظت کو مدنظر رکھتے ہوئے ربیغ اور خلیس میں بھی اسکول بند کردیے گئے ہیں جس سے والدین اور بچے دونوں پریشان ہیں کیونکہ اسکولوں میں ان دنوں امتحانات چل رہے ہیں اور ایک دن قبل بھی سعودی عرب کی ورلڈ کپ میں فتح کے سبب عام تعطیل کے اعلان کی وجہ سے اسکول بند کردیے گئے تھے۔
جدہ میں موسم سرما میں اکثر بارشیں ہوتی ہیں اور رہائشی اکثر خراب انفرااسٹرکچر کی شکایت کرتے رہے ہیں۔ 2009 میں شدید بارشوں کے نتیجے میں آنے والے سیلاب کے سبب 123 افراد ہلاک اور دو سال بعد بارشوں کی وجہ سے مزید 10 ہلاک ہو گئے تھے۔