اقوام متحدہ کے سیکریٹری جنرل نے ملالہ کو اقوام متحدہ کیلئے’امن کی پیامبر‘ مقرر کر دیا

امریکی خبر رساں ادارے ایسوسی ایٹڈ پریس (اے پی) کی رپورٹ کے مطابق اقوام متحدہ کے ترجمان اسٹیفن ڈوجارک نے جمعہ (7 اپریل) کو 19 سالہ ملالہ کے لیے اس اعزاز کا اعلان کیا۔

ترجمان کے مطابق ملالہ کو نئی ذمہ داری سونپنے کی تقریب پیر (10 اپریل) کو منعقد ہوگی جس کے بعد وہ سیکریٹری جنرل اور دنیا بھر سے تعلق رکھنے والے نوجوان نمائندگان سے لڑکیوں کی تعلیم کے حوالے سے گفتگو کریں گی۔

یہ خبر بھی پڑھیں: کینیڈا کا ملالہ یوسفزئی کواعزازی شہریت دینے کا اعلان

یاد رہے کہ ملالہ یوسف زئی کو 2012 میں سوات میں اسکول سے واپسی پر حملہ کرکے زخمی کردیا گیا تھا، اُس وقت ان کی عمر صرف 15 برس تھی، انھیں خواتین کی تعلیم کے لیے آواز اٹھانے پر نشانہ بنایا گیا تھا۔

ملالہ یوسف زئی کو ابتدائی طور پر پاکستان میں ہی طبی امداد دی گئی تھی تاہم بعد میں انھیں برطانیہ کے ہسپتال میں منتقل کردیا گیا تھا۔

انھیں 2014 میں بچوں کی تعلیم کے لیے مہم چلانے پر ہندوستان کے کیلاش ستھیارتھی کے ساتھ مشترکہ طور پر نوبیل امن انعام سے نوازا گیا تھا۔

ملالہ یوسف زئی نوبیل پرائز کے علاوہ ورلڈ چلڈرن پرائز جیسے ایوارڈز بھی حاصل کرچکی ہیں۔

یہ بھی پڑھیں: ملالہ یوسفزئی کو آکسفورڈ یونیورسٹی میں داخلے کی پیشکش

خیال رہے کہ رواں ماہ کے آغاز میں کینیڈا کے وزیراعظم نے بھی اعلان کیا تھا کہ نوبیل انعام یافتہ پاکستانی طالبہ ملالہ یوسف زئی ان کی پارلیمنٹ سے خطاب کریں گی اور انھیں 2014 میں اعلان کی گئی اعزازی شہریت سے نوازا جائے گا۔

اقوام متحدہ کے سیکریٹری جنرل کا اپنے اعلان میں کہنا تھا کہ ’خطرے کی آنکھوں میں آنکھیں ڈال کر بھی ملالہ نے خواتین، لڑکیوں اور تمام افراد کے حقوق کے لیے غیرمتزلزل عزم کا مظاہرہ کیا‘۔

سیکریٹری جنرل کے مطابق ’لڑکیوں کی تعلیم کے لیے ملالہ کی دلیرانہ سرگرمیوں نے دنیا بھر کے بہت سے افراد کو متاثر کیا ہے اور اب اقوام متحدہ کی کم عمر ترین امن کی پیامبر کی حیثیت سے وہ دنیا میں امن کے قیام کے لیے مزید کام کرسکیں گی‘۔

مزید جانئیے: معیاری تعلیم سے دہشتگردی کو شکست دی جا سکتی ہے، ملالہ یوسفزئی

واضح رہے کہ اقوام متحدہ کے دیگر امن کے پیامبروں میں اداکار مائیکل ڈوگلاس، لیونارڈو ڈی کیپریو، جین گوڈآل اور موسیقار ڈینیل بیرن بوئم اور یو یو ما شامل ہیں۔