پی آئی اے کے احتجاجی ملازمین کے گرد گھیرا تنگ کردیا گیا ہے۔راول پنڈی میں جوائنٹ ایکشن کمیٹی کے تین رہنماؤں کو پندرہ روز کیلئے نظر بند کر دیا گیا ہے۔ اسلام آباد ایئرپورٹ پر فلائٹ آپریشن جزوی طور پربحال ہوا ہے۔
بے نظیربھٹو ائیرپورٹ پر ہڑتال کرنے والے ملازمین کے خلاف راولپنڈی انتظامیہ ڈٹ گئی۔
انتظامیہ کا کہنا ہے کہ پی آئی اے کے احتجاجی ملازمین سے کوئی نرمی نہیں برتی جائے گی۔
ڈی سی او کے احکامات پر پی آئی اے جوائنٹ ایکشن کمیٹی کے تین رہنما پندرہ دن کیلئے نظر بند کر دیئے گئے ہیں۔
پولیس نے نقص امن کے خدشے کے پیش نظر سہیل مختار، طارق عزیز اور سلیم اختر کو حراست میں لے کر نامعلوم مقام پر منتقل کر دیا، جس نے مظاہرین کا پارا مزید چڑھا دیا۔
ہڑتال اور احتجاج کے باوجود بینظیر بھٹو ایئرپورٹ سے اندرون و بیرون ملک پروازیں بھی اڑان بھر رہی ہیں۔ تاہم دبئی، دوحہ، ریاض اور کراچی جانے والی پروازیں منسوخ کر دی گئی ہیں۔
