پاکستان کے ایک انتہائی قابل اور ہونہار نوجوان نے محض اپنی ذہانت اور محنت کی بناءپر وہ کارنامہ کردکھایا ہے کہ جو دنیا کی بڑی بڑی ٹیکنالوجی کمپنیوں کے لئے بھی قابل رشک ہے۔
محمد حارث کا تعلق لاہور سے ہے اور وہ ایک فری لانسر ٹیکنالوجی پروفیشنل ہیں جو کہ ”ورڈ پریس تھیم (wordpress theme) “سافٹ ویئر ٹیمپلیٹ ڈیزائن کرتے ہیں، جنہیں انٹرنیٹ صارفین اپنی ویب سائٹوں کو دلکش اور بہتر بنانے کے لئے استعمال کرتے ہیں۔
ویب سائٹ earnistan.com کے مطابق محمد حارث اور ان کے امریکی ساتھی لوک بیک نے Avada کے نام سے ایک ورڈ پریس تھیم ڈیزائن کیا جو دنیا بھر میں بے حد مقبول ہوا۔ اسے اب تک تقریباً 2لاکھ انٹرنیٹ صارفین خرید چکے ہیں، اور اس کی فروخت سے حاصل ہونے والی آمدنی ناقابل یقین 10ملین امریکی ڈالر (تقریباً ایک ارب پاکستانی روپے) سے بڑھ چکی ہے۔
Avadaورڈ پریس تھیم کے ریگولر لائسنس کی قیمت 59 ڈالر ہے جبکہ ایکسٹینڈڈ لائسنس کی قیمت 2950ڈالر ہے۔
دلچسپ بات یہ ہے کہ محمد حارث نہ ہی کسی بڑی کمپنی کے ملازم ہیں اور نہ ہی کسی دفتر میں جاکر کام کرتے ہیں، بلکہ اپنے گھر میں بیٹھ کر اپنے لیپ ٹاپ پر ہی اپنی شاندار تخلیقات کرتے ہیں۔
ان کا تخلیق کردہ Avada تھیم دنیا کا سب سے زیادہ فروخت ہونے والا تھیم قرار پایا ہے، اور لاکھوں انٹرنیٹ صارفین اپنی ویب سائٹیں تیار کرنے کے لئے اسے استعمال کررہے ہیں، جبکہ اس کی فروخت کا سفر ابھی رکا نہیں بلکہ بھرپور رفتار سے جاری ہے۔
