پاکستان کے سیکریٹری خارجہ سہیل محمود نے امریکی انڈر سیکریٹری برائے سیاسی امور کو ٹیلیفون کر کے دو طرفہ تعلقات اور علاقائی صورت حال پر تبادلہ خیال کیا۔
ترجمان دفتر خارجہ کے مطابق سیکریٹری خارجہ سہیل محمود نے امریکی انڈر سیکریٹری پالیٹیکل افیئرز وکٹوریہ نولینڈ سے فون پر رابطہ کر کے باہمی دل چسپی کے امور پر گفتگو کی، سیکریٹری خارجہ نے کہا پاکستان امریکا کے ساتھ اپنے تعلقات کو مزید بہتر اور مستحکم کرنا چاہتا ہے۔
سہیل محمود نے کہا امن اور ترقی کے مشترکہ اہداف کا حصول دونوں ملکوں کے درمیان باضابطہ روابط کے ذریعے ہی ممکن ہے، جیو اکنامک مقاصد پاکستان اور امریکا کے درمیان اقتصادی، تجارتی اور سرمایہ کاری پر مبنی تعلقات کے ذریعے ہی حاصل ہو سکتے ہیں۔
انھوں نے پاکستان کا مؤقف دہراتے ہوئے کہا کہ افغانستان میں تنازعات کا کوئی فوجی حل موجود نہیں، انھوں نے یقین دہانی کرائی کہ پاکستان افغان امن اور مفاہمتی عمل کی حمایت جاری رکھے گا۔
سیکریٹری خارجہ کا کہنا تھا کہ افغان مسئلے کے پُر امن حل کے لیے پاکستان اور امریکا کے درمیان مکمل ہم آہنگی موجود ہے، اس وقت بین الافغان مذاکرات میں تیزی لانے اور ذمہ دارانہ انخلا یقینی بنانے کی ضرورت ہے۔
ترجمان دفتر خارجہ کے مطابق اس گفتگو کے دوران مشترکہ مقاصد کے حصول کی خاطر دونوں ملکوں کے درمیان روابط جاری رکھنے پر اتفاق ہوا۔
