برطانیہ میں کورونا وائرس کی تباہ کاریوں کے بعد وہاں کے شہری اب دہری اذیت کا شکار ہوگئے، انتہائی اونچے درجے کے سیلاب سے لوگوں کی زندگی اجیرن ہوگئی۔
اس حوالے سے غیر ملکی ذرائع ابلاغ سے ملنے والی اطلاعات کے مطابق بیڈ فورڈ میں اونچے درجے کا سیلاب ہے، جس کے سبب وہاں کے مکین اپنی جانیں بچانے کیلئے بڑے پیمانے پر نقل مکانی کرتے ہوئے محفوظ مقامات کا رخ کررہے ہیں۔
بیڈ فورڈ انتظامیہ نے شہریوں کو ہدایت جاری کی ہے کہ دریائے گریٹ ہوز کے1300گھروں کو فوری طور پر خالی کیا جائے۔ دوسری جانب میٹ آفس نے اطلاع دی ہے کہ گزشتہ20سال میں یہ سب سے زیادہ اونچے درجے کا سیلاب ہے۔
واضح رہے کہ کرسمس سے قبل ہونے والی تیز بارش کی پیش گوئی سے قبل انگلینڈ اور ویلز میں فلڈ الرٹس جاری کردیئے گئے تھے کیونکہ میٹ آفس نے ہفتے کے آخر میں بارش کے بعد خراب موسم کی وارننگ جاری کی تھی۔
وسط اور ساؤتھ ویلز کے ساتھ ساتھ جنوبی انگلینڈ میں بھی بارش میں بہت تیزی دیکھی گئی جس کے بعد محکمہ موسمیات کے عہدیداروں نے لوگوں کو خبردار کیا تھا کہ وہ ممکنہ سیلاب کے لئے تیار رہیں۔
