ترک صدر رجب طیب اردگان کا کہنا ہے کہ ترکی بیرون دھمکیوں کے آگے سر جھکانے والا ملک نہیں ہے۔
ترک صدر رجب طیب اردگان نے کنونشن سینٹر میں منعقد تقریب سے خطاب کے دوران کہا کہ مشرقی بحیرہ روم میں دھمکیوں کی زبان وقعت کھو چکی ہے اور مخالف قوتوں کو پتہ چل گیا ہے کہ ترکی کسی کے آگے سر نہیں جھکائے گا۔
رجب طیب اردگان کا کہنا تھا کہ ترکی مشرقی بحیرہ روم کے طویل ترین ساحلی علاقے کا حامل ہے جسے بیرونی طاقتوں کے ذریعے محدود کرنے کی اجازت نہیں ملے گی۔
انہوں نے کہا کہ ہم نے ہمیشہ بچکانہ حرکات کے سامنے اپنے حقوق کا جائز دفاع کرتے ہوئے ایک مدبر ریاست کا منظر بخوبی پیش کیا ہے۔
ترک صدر کا کہنا تھا کہ قومی اتحاد اور یکجہتی کو نشانہ بنانے والوں کو اب خون کے ہر قطرے کا حساب دینا پڑ رہا ہے۔ جس طرح ہم نے پیاڑوں میں چھپے دہشتگردوں کے جتھوں کو ختم کرنے کا سلسلہ جاری رکھا ہوا ہے۔ اسی طرح ہمارے شہروں میں روپوش ان کے ساتھیوں کو بھی کیفر دار تک پہنچا جائے گا۔
یاد رہے کہ گزشتہ ماہ ترک صدر رجب طیب اردوان نے بحیرہ اسود میں تاریخ کی سب سے بڑی گیس دریافت کا اعلان کرتے ہوئے کہا تھا کہ بحیرہ اسود سے 320 بلین مکعب میٹر قدرتی گیس دریافت ہوئی ہے، 2023 میں قدرتی گیس کے ان ذخائر سے قوم کو فراہمی شروع کریں گے۔
