میلبورن میں چاقو کے حملے کا واقعہ، ایک شخص ہلاک

آسٹریلوی شہر میلبورن میں چاقو گھونپنے کے واقعے میں ایک شخص ہلاک جبکہ دیگر دو زخمی ہو گئے ہیں۔ آسٹریلوی پولیس کے مطابق چاقو سے مسلح شخص کو فائرنگ کر کے زخمی کر دیا گیا اور حراست میں لے لیا گیا ہے۔

خبر رساں ادارے روئٹرز نے وکٹوریا کے پولیس سپرنٹنڈنٹ ڈیوڈ کلیٹون کے حوالے سے بتایا کہ پولیس اہلکاروں کو چاقو سے ڈرانے والے ایک شخص کو گولی مار کر زخمی کر دیا گیا جس کے بعد اسے پولیس کی نگرانی میں ہسپتال منتقل کر دیا گیا جہاں اس کی حالت اب تشویشناک ہے۔

ڈیوڈ کیلٹون کے مطابق، ’’تین لوگوں کو چاقو کے حملے میں زخمی کیا گیا۔ بدقسمتی سے ان میں سے ایک موقع پر ہی ہلاک ہو گیا۔‘‘ پولیس سپرنٹنڈنٹ کا مزید کہنا تھا، ’’ابھی تک اس واقعے کا بظاہر دہشت گردی کوئی تعلق نظر نہیں آ رہا تاہم اس حوالے سے مزید تفتیش کی جائے گی۔‘‘ اس واقعے کے بعد پولیس نے متاثرہ علاقے کو لوگوں کی آمد و رفت کے لیے بند کر دیا۔

قبل ازیں وکٹوریا پولیس کی طرف سے ایک بیان میں کہا گیا، ’’پولیس کو ابتدائی طور پر ایک کار میں آگ لگنے کی رپورٹ ملی تھی۔ ایک شخص کو واقعے کے مقام سے گرفتار کر کے پولیس کی نگرانی میں ہسپتال پہنچایا گیا جس کی حالت تشویشناک ہے۔‘‘ اس بیان میں مزید کہا گیا تھا کہ کچھ لوگوں کو چاقو کے زخم لگنے کے بعد ابتدائی طبی امداد فراہم کی جا رہی ہے۔

 

install suchtv android app on google app store