لندن میں تین عورتوں پر دہشت گردی کا مقدمہ دائر

لندن پولیس فائل فوٹو لندن پولیس

لندن پولیس نے دہشت گردی اور قتل کی منصبوبہ سازی کے الزام میں تین خواتین پر فرد جرم عائد کردی ہے تینوں خواتین کو آج عدالت میں پیش کیا جاسکتا ہے۔

لندن پولیس نے کہا ہے کہ تین عورتوں پر دہشت گردی کا منصوبہ تیار کرنے کی فردِ جرم عائد کر دی گئی ہے۔ ان میں سے ایک کو پولیس کے چھاپے کے دوران گولی مار کر زخمی کر دیا گیا تھا۔

21 سالہ رزلین بولر کا تعلق وسطی لندن سے ہے۔ 43 سالہ مینا ڈِچ ساؤتھ ویسٹ لندن سے ہیں، جب کہ 20 سالہ خولہ برغوثی نارتھ ویسٹ لندن کے علاقوں سے ہیں۔ ان پر قتل کی سازش کا الزام بھی عائد کیا گیا ہے۔

انھیں انسدادِ دہشت گردی کی ایک کارروائی کے دوران گرفتار کیا گیا تھا جس کے دوران بولر کو پولیس نے گولی مار کر زخمی کر دیا تھا۔اب یہ خواتین ویسٹ منسٹر کی عدالت میں جج کے سامنے پیش ہوں گی۔

ڈِچ بولر کی والدہ ہیں۔ انھیں کینٹ سے گرفتار کیا گیا تھا جب کہ برغوثی کو 27 اپریل کو نارتھ ویسٹ لندن سے پکڑا گیا تھا۔بولر کو تین دن بعد ہسپتال سے فارغ ہونے کے بعد گرفتار کیا گیا تھا۔

install suchtv android app on google app store