امریکا نے افغان شہریوں کی امیگریشن کی تمام درخواستیں غیر معینہ مدت کے لیے معطل کر دی ہیں۔ امریکی میڈیا کے مطابق یہ فیصلہ واشنگٹن میں نیشنل گارڈ کے دو اہلکاروں پر حملے کے بعد کیا گیا، جس میں ایک افغان شہری نے فائرنگ کی تھی۔
اس واقعے کے فوراً بعد ٹرمپ انتظامیہ نے افغان شہریوں کی امیگریشن درخواستیں روک دینے کا حکم دیا۔
امریکی سیٹیزن شپ اینڈ امیگریشن سروس نے سوشل میڈیا سائٹ ایکس پر بیان جاری کرتے ہوئے کہا کہ افغان شہریوں کے لیے امیگریشن کے تمام کیسز غیر معینہ مدت کے لیے روک دیے گئے ہیں۔
اس کے ساتھ ساتھ ایجنسی نے واضح کیا کہ افغان شہریوں کے لیے امیگریشن درخواستوں کی سیکیورٹی اور جانچ کے پروٹوکول کا مزید تفصیلی جائزہ لیا جائے گا۔
واضح رہے کہ 26 نومبر کو امریکی دارالحکومت واشنگٹن میں وائٹ ہاؤس کے قریب نیشنل گارڈ کے دو اہلکاروں کو فائرنگ سے زخمی کر دیا گیا تھا۔ زخمی ہونے والے اہلکاروں کی حالت اس وقت تشویشناک بتائی جا رہی ہے۔
امریکی حکام کے مطابق ایک مشتبہ شخص کو حراست میں لیا گیا ہے جس کی شناخت 29 سال کے افغان شہری رحمان اللہ لکنوال سے کر لی گئی۔
