دنیا کا سب سے بڑا سرچ انجن گوگل ایک کلک پر دنیا جہان کی معلومات فراہم کرسکتا ہے، چھوٹے سے پریشان کردینے والے سوال سے لے کر زندگی کے بڑے بڑے مسئلوں تک کا حل گوگل آپ کو بتا سکتا ہے۔
لیکن بعض اوقات گوگل ہمیں مصیبت سے بھی دو چار کرسکتا ہے، ویسے تو بے شمار ایسی چیزیں ہیں جنہیں سرچ کرنے سے گریز کرنا چاہیئے، لیکن یہاں ہم آپ کو ان میں سے چند کے بارے میں بتا رہے ہیں۔
اگر آپ بیمار محسوس کر رہے ہیں تو ہرگز بیماری کی علامات گوگل نہ کریں، بعض اوقات گوگل مرض کی صحیح تشخیص نہیں کرتا، جب تشخیص غلط ہوگی تو آپ دوائیں بھی غلط استعمال کریں گے اور یہ بعض اوقات جان لیوا بھی ثابت ہو سکتا ہے، اس لیے اگر آپ بیمار ہیں تو ڈاکٹر سے رجوع کریں۔
گوگل پر جرائم، منشیات، بم یا کسی قسم کا ہتھیار بنانے کی ترکیب ڈھونڈنا آپ کو ناگہانی مشکلات میں ڈال سکتا ہے۔
ملک کی سیکیورٹی ایجنسیاں اس طرح کے مواد پر نظر رکھتی ہیں اور آپ کے کمپیوٹر کا آئی پی ایڈریس ان کے ڈیٹا بیس میں آسکتا ہے، جس سے آپ نہ چاہتے ہوئے بھی مشکل میں پھنس سکتے ہیں۔
اپنا نام
گوگل پر اپنا نام ڈھونڈنے سے بھی گریز کریں، کیونکہ گوگل کے ڈیٹا بیس میں آپ کی پرانی تصاویر اور معلومات سامنے آئیں گی جو ہو سکتا ہے کہ آپ کے لیے زیادہ خوشگوار ثابت نہ ہو۔
کھٹمل
گھر میں کھٹمل ہوجائیں تو لوگ ان سے چھٹکارہ حاصل کرنے کے لیے ہر طریقہ آزماتے ہیں، اور بعض اوقات ان طریقوں کی تلاش میں گوگل کا سہارا بھی لیتے ہیں۔
لیکن گوگل پر بیڈ بگز (کھٹمل) کو سرچ کرنا آپ کو وہم میں مبتلا کرسکتا ہے، گوگل پر موجود معلومات لوگوں کو اس بات پر بھی قائل کر سکتی ہے کہ 6 ٹانگوں والا یہ کیڑا آپ کے بستر میں چھپا ہوا ہے، چاہے ایسا نہ بھی ہو۔
کھانے میں ملنے والی چیزیں
اکثر ریستورانوں کی ناقص کارکردگی کے باعث کھانوں میں کچھ ایسی چیزیں نکل آتی ہیں کہ دیکھ کر ہمیشہ کے لیے دل اچاٹ ہوجائے، اگر آپ ان چیزوں سے جڑے واقعات کو پڑھ لیں گے تو آئندہ باہر کھانے کا سوچیں گے بھی نہیں۔
ترجمہ
اگر آپ کسی زبان کو سمجھنے کے لیے گوگل کا سہارا لیتے ہیں تو اس سے گریز کریں کیونکہ زیادہ امکان یہی ہے کہ آپ کے جملے کا مطلب بالکل بدل جائے گا۔
مفت اینٹی وائرس ایپلی کیشنز اور سافٹ ویئر
انٹرنیٹ پر بے شمار جعلی اینٹی وائرس ایپلی کیشنز اور سافٹ ویئرز موجود ہیں، اگر آپ کسی مستند ایپ یا سافٹ ویئر کی تلاش میں ہیں تو زیادہ امکان یہی ہوگا کہ اس کوشش میں آپ میل ویئر یا وائرسز انسٹال کرلیں گے۔
