گوادر اسٹیڈیم میں کوئٹہ گلیڈی ایٹرزکا کراچی کنگز سے میچ ہوگا: فخرعالم

گوادر کرکٹ اسٹیڈیم فائل فوٹو گوادر کرکٹ اسٹیڈیم

معروف گلوکار فخر عالم نے دعویٰ کیا ہے گوادر کرکٹ اسٹیڈیم میں 25 مارچ کو پاکستان سپر لیگ (پی ایس ایل) کی ٹیمیں کوئٹہ گلیڈی ایٹرز اور کراچی کنگز کے درمیان میچ ہوگا۔

پاکستان کرکٹ بورڈ (پی سی بی) اور حکومت بلوچسان کی جانب سے گوادر میں پی ایس ایل ٹیموں کے درمیان میچ کی تصدیق نہیں کی۔

سماجی رابطے کی ویب سائٹ ٹوئٹر پر فخر عالم نے ویڈیو پیغام میں کہا کہ 'گوادر کرکٹ اسٹیڈیم کا سلسلہ شروع ہونے کے بعد پیغامات موصول ہوتے رہے، گوادر کےلوگ اور انتظامیہ، بلوچستان کے عوام چاہتے تھے کہ کوئی بڑا تہلکہ کیا جائے اور ہم نے ایک دوستانہ میچ منعقد کیا'۔

انہوں نے کہا کہ 'گوادر ڈولفنز بمقابلہ شوبز شالک کے درمیان سپر ہے پاکستان کپ منعقد کیا اور میں پی سی بی کے سی ای او وسیم خان کو اپنے ساتھ لے کر گیا اور وہ خود وہاں جا کر کھیلے اورمتاثر ہوئے'۔

ان کا کہنا تھا کہ 'میں چاہتا تھا کہ پی ایس ایل 6 کا کوئی ایک میچ وہاں ہو لیکن اب بھی اسٹیڈیم میں کچھ کام باقی ہے، آئی سی سی اور پی سی بی کے معیار کے حوالے سے مسائل ہیں، اس لیے سرکاری سطح پر میچ کروانا مشکل تھا'۔

فخر عالم نے کہا کہ 'میں سب کو بڑی خبر دینا چاہتا ہوں کہ پاکستان کرکٹ بورڈ نے باقاعدہ طور پر سرکاری سطح پر حکومت بلوچستان کو آگاہ کردیا ہے کہ 25 مارچ 2021 کو پی ایس ایل ختم ہونے کے فوری بعد پی سی بی گوادر کرکٹ اسٹیڈیم میں کراچی کنگز بمقابلہ کوئٹہ گلیڈی ایٹرز میچ کرائے گا'۔

انہوں نے کہا کہ 'اس سے زیادہ زبردست خبر کرکٹ کے شائقین، میرے لیے، گوادراور بلوچستان کے لوگوں کے لیے نہیں ہوسکتی اور سب کو مبارک ہو، آپ سب کے پیغامات اور دعائیں رنگ لے آئی ہیں'۔

ان کا کہنا تھا کہ 'میں کرکٹ بورڈ کا بہت شکریہ ادا کرنا چاہتا ہوں، وسیم خان کا بہت شکریہ، کوئٹہ گلیڈی ایٹرز اور کراچی کنگز دونوں فرنچائز، ندیم عمر اور سلمان اقبال کا یہ سب کرنے پر شکریہ '۔

انہوں نے کہا کہ 'اب حکومت بلوچستان پر ہے، مجھے یقین ہے کہ وزیراعلیٰ جام کمال ایک پروگریسو شخصیت ہیں اس لیے امید ہے کہ وہ یہ میچ زبردست طریقے سے کروائیں گے اور امید کرتا ہوں میں خود یہ میچ اسٹیڈیم میں جا کر دیکھوں گا'۔

پی سی بی اور حکومت بلوچستان کی جانب سے اس حوالے سے کوئی بیان سامنے نہیں آیا تاہم کراچی کنگز کے مالک سلمان اقبال نے فخر عالم کی ٹوئٹ کو ری ٹوئٹ کیا اور ردعمل میں 'ان شااللہ' کہا۔

 

subscribe YT Channel install suchtv android app on google app store