قومی ٹیم کے کون سے اہم آل راؤنڈر انگلینڈ پہنچ گئے؟ جانیے اس خبر میں

انگلینڈ کے خلاف ٹی ٹوئنٹی سیریز کے لیے قومی ٹیم کے آل راؤنڈر اور سینئر کھلاڑی شعیب ملک براستہ دبئی انگلینڈ پہنچ گئے ہیں۔

دو کورونا ٹیسٹ منفی آنے پر وہ ساؤتھمپٹن میں موجود پاکستانی اسکواڈ کو جوائن کریں گے اور بائیو سیکیور ببل کا حصہ بنیں گے۔

شعیب ملک نے اہلخانہ کے ساتھ وقت گزارنے کے لیے پی سی بی سے درخواست کی تھی۔

شعیب ملک پانچ ماہ سے اپنے اہلخانہ سے نہیں مل سکے تھے، کورونا کے باعث سفری پابندیوں کی وجہ سے ملک کی اہلیہ اور بیٹے سے ملاقات نہیں ہوئی تھی۔

گزشتہ دنوں شعیب ملک کی اہلیہ ثانیہ مرزا نے ویڈیو پیغام میں کہا تھا کہ ان کا بیٹا اپنے والد کو یاد کررہا ہے جن سے وہ لاک ڈاؤن کی وجہ سے نہیں مل پایا۔

جس پر پی سی بی نے انہیں خصوصی اجازت دیتے ہوئے تاخیر سے ٹیم کو جوائن کرنے کا کہا تھا، کلیئرنس ملنے پر کرکٹر براستہ دبئی روانہ ہوئے اور اب انگلینڈ پہنچ گئے ہیں۔