قومی ٹیم کے نوجوان آل راؤنڈر فہیم اشرف ٹی ٹوئنٹی کرکٹ میں پاکستان کی جانب سے ہیٹ ٹرک کرنے والے پہلے بالر بن گئے ہیں۔
سری لنکا کے خلاف ابو ظہبی میں کھیلے گئے دوسرے ٹی ٹوئنٹی میں فہیم اشرف نے اننگز کے 19 ویں اوور کی چوتھی گیند پر اڈانا کو آؤٹ کیا تو یہ ان کی پہلی وکٹ تھی۔
فہیم اشرف نے اگلی ہی گیند پر اداوتے کو بھی باؤنڈری پر کیچ آؤٹ کرا دیا اور پھر اسی اوور کی آخری گیند پر نوجوان پیسر نے پتھیرانا کو ایل بی ڈبلیو کر کے اپنی ہیٹ ٹرک مکمل کی۔
مزید جانئیے: پاکستان نے سنسنی خیز مقابلے کے بعد سری لنکا کو شکست دیدی
اس طرح فہیم اشرف نے ٹی ٹوئنٹی کرکٹ میں ہیٹ ٹرک کرنے والے پہلے پاکستانی بالر ہونے کا اعزاز اپنے نام کیا۔
فہیم اشرف دنیا کے چھٹے بالر ہیں جو اب تک ٹی ٹوئنٹی میں ہیٹ ٹرک کا کارنامہ انجام دے چکے ہیں۔
اس سے قبل آسٹریلیا کے بریٹ لی، نیوزی لینڈ کے ٹم ساؤتھی اور جیکب اورم اور سری لنکا کے تھسارا پریرا اور لستھ ملنگا یہ کارنامہ انجام دے چکے ہیں۔
