طبی ماہرین نے ڈیلٹا ویرینٹ کے پھیلاؤ میں تیزی کے پیش نظر کراچی میں 15 دن کیلئے مکمل لاک ڈاؤن کی تجویز دیتے ہوئے کہا اسپتالوں میں دباؤ بڑھا تو خطرناک صورتحال ہوسکتی ہے۔
سیکریٹری جنرل پی ایم اے ڈاکٹر قیصر سجاد نے کراچی میں کورونا صورتحال کے حوالے سے خصوصی گفتگو کرتے ہوئے کہا ہے کہ ڈیلٹاویرینٹ بہت تیزی سے پھیلتا ہے، بھارت کی صورتحال سب کےسامنے تھی، خدانخواستہ بھارت جیسی صورتحال پاکستان میں بھی ہوسکتی ہے۔
سیکریٹری جنرل پی ایم اے کا کہنا تھا کہ عید پر لوگ گلے ملے ، ہاتھ بھی ملاتے رہے، مویشی منڈیوں میں بھی ایس اوپیز پرعمل نہ ہوا، حکومت کی جانب سے تجاویز مانگی گئی ہیں ، فیصلہ ہوا ہے کہ اسٹیک ہولڈرزسے مشاورت کی جائے گی۔
ڈاکٹر قیصر سجاد نے کراچی میں لاک ڈاؤن کی تجویز دیتے ہوئے کہا صرف ایک حل ہےکراچی میں 15دن کیلئےلاک ڈاؤن لگایاجائے، اسپتالوں میں دباؤ بڑھا تو خطرناک صورتحال ہوسکتی ہے،بہت سے لوگ ایسے ہیں جنہوں نے ٹیسٹ نہیں کرائے ہیں، لوگ ایس اوپیز پرسختی سے عمل کریں اور ویکسین لگوائیں۔
ان کا کہنا تھا کہ آج پہلی بار 980مریضوں کی تشویشناک حالت ہے، کیسز کی تعدادکم ہوتو لاک ڈاؤن کی ضرورت نہیں ہوگی اور تمام کاروبار کھلا رہے تو سختی سے ایس اوپیز پر عمل کرنا ہوگا۔
سیکریٹری جنرل پی ایم اے نے مزید کہا کہ کراچی میں دیگرشہروں اوردنیا بھر سے لوگ آتے ہیں، پنجاب حکومت نے بہت سختی سے ایس اوپیزپر عمل کرایا، پنجاب حکومت اور وزیرصحت پنجاب کی کاوشوں کو سراہتاہوں۔
ڈاکٹر قیصر سجاد کا کہنا تھا کہ ہاتھ جوڑ کر درخواست کرتاہوں کہ خدارا ایس اوپیز فالو کریں ، احتجاج کرکےکاروبار کھلوا لیں اورایس اوپیزپر عمل نہ ہوتو یہ زیادتی ہوگی۔
دوسری جانب ڈاکٹر سعیدخان نے گفتگو میں کہا کہ ویکسینیشن کیلئے حکومت نے موبائل ٹیم بھی مرتب کی ہے ، لوگ ابھی بھی ویکسین لگوانے میں بہانے کررہےہیں، ویکسین سینٹرزمیں کافی اقدامات کئے گئے ہیں۔
ڈاکٹر سعیدخان کا مزید کہنا تھا کہ کورونا کی صورتحال جنگی ہے حکومت کاساتھ دیناچاہیے، کوروناکی چوتھی لہر ابھی پوری طرح سے نہیں آئی ، چوتھی لہر سے خدانخواستہ بھارت جیسی صورتحال کا سامنا ہوسکتا ہے۔
