پنجاب کے شہر گوجرانوالہ کے علاقے چراغ آباد میں ایک گھر کی بوسیدہ چھت گرنے سے تین بچے جاں بحق ہو گئے۔
اے آر وائی نیوز کے مطابق علی پور چھٹہ کے علاقے چراغ آباد میں گزشتہ رات بوسیدہ ہونے کے باعث ایک گھر کی چھت اس کے مکینوں پر گر پڑی، جس کے ملبے کے نیچے دب کر 3 بچے جاں بحق جب کہ میاں بیوی زخمی ہو گئے۔
ریسکیو ذرایع کا کہنا ہے کہ جاں بحق ہونے والوں میں 8 سالہ کرن، 5 سالہ علی، 2 سالہ ساحل شامل ہیں، جب کہ زخمی میاں بیوی کو تشویش ناک حالت میں ڈی ایچ کیو اسپتال منتقل کیا گیا۔
چمن میں مکان کی چھت گرنے سے 6 افراد جاں بحق
یاد رہے کہ 11 جنوری کو صوبہ بلوچستان کے علاقے چمن میں کلی لقمان میں مکان کی چھت گرنے سے چار خواتین سمیت 6 افراد جاں بحق جب کہ 2 افراد زخمی ہو گئے تھے، مکان کی چھت بارش کے باعث گری تھی اور گھر میں موجود تمام افراد ملبے کے نیچے دب گئے تھے، مقامی افراد نے اپنی مدد آپ کے تحت لاشوں اور زخمیوں کو باہر نکالا۔
اس سے قبل 8 جنوری کو پنجاب کے شہر لاہور میں مکان کی چھت گرنے سے ایک ہی خاندان کے 3 افراد جاں بحق ہو گئے تھے، یہ حادثہ لاہور کے علاقے یوحنا آباد کے علاقے خالد نگر میں پیش آیا تھا، مکان خستہ حالت میں تھا، جس کی چھت گرنے کے نتیجے میں ماں اور 2 بچے جاں بحق ہوئے۔
