وزیر اعلیٰ پنجاب میاں شہباز شریف نے کہا ہے کہ سول اور ملٹری اداروں کی مشترکہ کوششوں سے زینب کے قاتل کو گرفتار کرلیا گیا ہے مجرم عمران سیریل کلر ہے۔
لاہور میں مقتولہ زینب کے والد اور وزیر قانون پنجاب رانا ثنا اللہ کے ہمراہ پریس کانفرنس کرتے ہوئے وزیراعلیٰ پنجاب شہباز شریف کا کہنا تھا کہ زینب قتل کیس کے لیے بنائی گئی جے آئی ٹی کے ساتھ انٹیلی جنس ایجنسیز اور دیگر اداروں کی انتھک محنت کے بعد ملزم کو گرفتار کرلیا گیا ہے جو کہ سیریل کلر ہے۔
شہباز شریف نے کہا کہ دل کی گہرائیوں سے پنجاب کی کیبنٹ کمیٹی، وزرا اور آئی جی پنجاب سمیت دیگر اداروں کا شکریہ ادا کرتا ہوں جنہوں نے کیس کی پیروی کی۔
انہوں نے کہا کہ زینب کے والد اور میرا بھی دل چاہتا ہے کہ اس درندے کو چوک پر پھانسی لٹکا دیا جائے لیکن ہم سب قانون کے تابع ہیں۔
وزیراعلیٰ پنجاب نے کہا کہ چیف جسٹس لاہور ہائیکورٹ سے کہیں گے کہ اس واقعے کو جلد از جلد پایہ تکمیل تک پہنچائیں۔ یہ کیس انسداد دہشتگردی کی عدالت میں چلے گا اور اس میں بلا تاخیر تمام تقاضے پورے کیے جائیں گے۔
اس سے قبل کیس کے ملزم کا ڈی این اے زینب سمیت دیگر 7 وارداتوں سے بھی میچ ہوگیا۔ سفاک قاتل نے 2015ء میں پہلی بار معصوم بچی کو زیادتی کے بعد قتل کیا تھا۔
زینب قتل کیس میں پکڑے جانے والا عمران مزید 7 کیسز میں بھی ملزم نکلا۔ پولیس کے مطابق زینب سمیت زیادتی کے بعد قتل کی گئی 7 بچیوں کا بھی ڈی این اے میچ کرگیا۔ ملزم عمران نے پہلی واردات جون 2015ء میں کی۔ ملزم 3 سال سے ایک ہی محلے اور گھر میں رہائش پذیر تھا۔
