ہنگو میں پولیس اور سیکیورٹی فورسز کے کامیاب آپریشن میں 5 دہشت گرد ہلاک، ڈسٹرکٹ پولیس آفیسر (ڈی پی او) ہنگو، دوآبہ کا تھانیدار اور قانون نافذ کرنیوالے ادارے کا افسر زخمی ہوگئے۔
ذرائع کے مطابق ہنگو کے علاقے زرگری شناواری میں دہشت گردوں کی موجودگی کی خفیہ اطلاع پر پولیس اوردیگر قانون نافذ کرنے والے اداروں نے مشترکہ کارروائی کی، اس آپریشن کے دوران دہشت گردوں اور قانون نافذ کرنے والے اہلکاروں کے درمیان شدید فائرنگ کا تبادلہ ہوا۔
بہادری سے مقابلہ کرتے ہوئے سیکیورٹی فورسز نے 5 دہشت گردوں کو ہلاک کر دیا۔
فائرنگ کے تبادلے میں ڈسٹرکٹ پولیس آفیسر (ڈی پی او) ہنگو خالد خان، اسٹیشن ہاؤس آفیسر (ایس ایچ او) دوآبہ اور سیکیورٹی فورسز کے ایک افسر زخمی ہو گئے۔
پولیس حکام کے مطابق آپریشن کا سلسلہ تاحال جاری ہے، علاقے میں کلیئرنس تک آپریشن جاری رکھا جائے گا۔
انسپکٹر جنرل پولیس (آئی جی پی) خیبر پختونخوا ذوالفقار حمید نے زخمی ہونے والے افسران سے بات کی، اور ان کی خیریت دریافت کی، ڈی پی او خالد خان کی حالت مستحکم بتائی جا رہی ہے اور انہیں کوہاٹ منتقل کیا جا رہا ہے، جہاں سے انہیں ہیلی کاپٹر کے ذریعے پشاور منتقل کیا جائے گا۔
ریجنل پولیس آفیسر (آر پی او) کوہاٹ عباس مجید مروت ڈی پی او ہنگو کے ہمراہ ہیں۔
آئی جی ذوالفقار حمید خان کا کہنا ہے کہ قانون نافذ کرنے والے اداروں کا عزم ہے کہ وہ دہشت گردی کے خلاف اپنی جنگ جاری رکھیں گے۔
