پاکستان مسلم لیگ (ن) کے رہنما خواجہ آصف نے کہا ہے کہ ماضی میں شوگر مافیا کے صرف 3 ناموں نے 165 ارب روپے کی دیہاڑی لگائی تھی۔
لیگی رہنما نے تحریک انصاف کی حکومت کے 14 ماہ میں چینی کی قیمتوں میں 50 فیصد اضافے والی خبر کے جواب میں ٹوئٹ کی تاہم کسی شخصیت کا نام نہیں لیا۔
انہوں کہا کہ شوگر مافیا کے صرف 3 ناموں نے 165 ارب کی دھیاڑی لگائی ہے۔
ان کا کہنا تھا کہ گندم میں کتنے سو ارب کا چونا لگا ہے، اس کا جلد پتہ چلے گا، عوام رل گئے ہیں اور غریب خودکشی کر رہاہے لیکن اقتدار سے وابستہ چند افراد سیکڑوں ارب بناگئے ہیں۔
شوگر ما فیا کے صرف 3 ناموں نے 165 ارب کی دھیاڑی لگائ ھے، گندم میں کتنے سو ارب کا چونا لگا ھے جلد پتہ چلے گا۔ عوام رل گئے غریب خودکشی کر رھا ھے۔ اقتدار سے وابستہ چند افراد سینکڑوں ارب بنا گئے https://t.co/qIxdyMu9IZ
— Khawaja M. Asif (@KhawajaMAsif) January 19, 2020
یاد رہے کہ ملک بھر میں آٹے کا بحران شدت اختیار کر چکا ہے اور کراچی، حیدرآباد اور لاہور سمیت مختلف شہروں میں فی کلو آٹے کی قیمت 70 روپے تک پہنچ گئی ہے۔
آٹا مہنگا ہونے کے باعث عوام کی فروخت سے باہر ہوچکا ہے جبکہ حکومت کی جانب سے بحران کو مصنوعی قرار دیا جارہا ہے اور پیر تک اس پر قابو پانے کے دعوے کیے جارہے ہیں۔
وزیر اعظم عمران خان نے آٹے کی قیمت میں اضافے کا نوٹس لیا ہے اور آٹے کے بحران سے نمٹنے کیلئے گرینڈ آپریشن کی ہدایت بھی کررکھی ہے تاہم اس کے باوجود آٹے کی قیمتوں کو پر لگ چکے ہیں۔