مائیکروسافٹ کے بانی بل گیٹس نے کے پی میں بڑھتے پولیوکیسز پر اجلاس طلب کرنے پر وزیراعظم کا شکریہ ادا کرتے ہوئے ستمبرمیں اقوام متحدہ اجلاس میں عمران خان سے ملاقات کی خواہش کا اظہار کیا۔
تفصیلات کے مطابق وزیراعظم عمران خان کو مائیکروسافٹ کے بانی بل گیٹس نے خط لکھا، جس میں کےپی میں بڑھتے پولیوکیسز پراجلاس طلب کرنے پر وزیراعظم کا شکریہ اداکیا اور پولیو کے خاتمے کی کوششوں پر حکومت پاکستان کو خراج تحسین پیش کیا۔
بل گیٹس کا کہنا تھا کہ پولیو ختم کرنے کےلیے ذہنوں سے شکوک نکالنا انتہائی ضروری ہے، حفاظتی ٹیکہ جات پروگرام پر حکومت کی خصوصی توجہ درکار ہے۔
مائیکروسافٹ کے بانی نے انسدادپولیو ،ڈاکٹر ثانیہ نشتر اور احساس پروگرام کی بھی تعریف کی اور ستمبرمیں اقوام متحدہ اجلاس میں وزیراعظم سے ملاقات کی خواہش کا اظہار کیا۔
خیال رہے کےپی میں پولیوکیسز پر وزیراعظم عمران خان نے ہنگامی اجلاس طلب کیا تھا ، وزیراعظم عمران خان کو پولیوکیسز سے متعلق رپورٹ پیش کی گئی ، جس میں بتایا گیا گزشتہ سال خیبرپختونخوا میں پولیو کا کوئی کیس سامنے نہیں آیا تھا، 10 اضلاع میں رواں سال پولیو کے 41 کیس سامنے آئے۔
رپورٹ کے مطابق بنوں ڈویژن میں 30 پولیو کیس رپورٹ ہوچکے ہیں ، مختلف اضلاع میں 76 پولیو ورکرز اور اہلکار شہید کیےگئے، ایمرجنسی آپریشن سینٹر کے سینئر افسران کو مختلف ڈویژن میں متحرک کیا گیا۔
نکات میں بتایا گیا انکاری والدین کو راضی کرنے کے لیےبااثرافراد سے رابطے کیے ، ویکسی نیشن پرمنفی پروپیگنڈا ختم کرنے کے اقدامات کیے ہیں۔
یاد رہے کہ 27 جون کو نیشنل ایمرجنسی آپریشن سینٹر نے کہا تھا کہ خیبر پختون خوا میں 5 نئے پولیو کیسز سامنے آئے ہیں، اِنڈ پولیو پروگرام کے مطابق رواں سال کے پی کے میں اب تک 32 کیسز سامنے آ چکے ہیں۔
واضح رہے ملک بھر میں پولیو کا مرض سنگین صورت حال اختیار کر گیا ہے، پاکستان میں رواں برس پولیو کیسز کی مجموعی تعداد 53 ہو چکی ہے، سب سے زیادہ پولیو کیسز خیبر پختون خواہ میں سامنے آئے۔
