اطلاعات ونشریات کے وزیر فواد چوہدری نے پلوامہ حملے سے متعلق بھارتی الزامات کو قطعی غلط اور بے بنیاد قرار دیا ہے۔ انہوں نے کہاکہ پاکستان خطے میں دہشت گردی کی بجائے امن اور رواداری کو فروغ د ے رہا ہے۔
وزیراطلاعات نے بھارتی حکومت کے رویے کو نہایت افسوسناک قراردیا جو کسی ثبوت اورتحقیقات کے بغیر اس طرح کے واقعات کے حوالے سے پاکستان کوموردالزام ٹھہراتی ہے۔ فوادچوہدری نے کہا کہ پاکستان میں لوگوں کو آزادی حاصل ہے اور انسانی حقوق کا احترام کیا جانا چاہیے جبکہ بھارت مقبوضہ کشمیر میں انسانی حقوق کی سنگین خلاف ورزیوں کا ارتکاب کر رہا ہے۔
انہوں نے کہاکہ موجودہ حکومت بھارت سمیت تمام ہمسایہ ملکوں کے ساتھ اچھے تعلقات کی خواہشمندہے اوراس سلسلے میں کرتارپور سرحد کھولنے کا اقدام جذبہ خیرسگالی پرمبنی تھا۔ ایک سوال کے جواب میں انہوں نے کہاکہ پاکستان افغانستان میں ا من کی بحالی میں بھی اپنا کردارادا کر رہا ہے اور خطے میں تجارتی سرگرمیوں کے فروغ کے لئے مختلف اقدامات کر رہا ہے۔
