چیف جسٹس پاکستان میاں ثاقب نثار کا کہنا ہے کہ ڈیم کی تعمیر پاکستان کے لیے ناگزیر ہے، پانی کے بحران کا حل نہیں نکالا گیا تو لوگ ملک سے ہجرت کرنے پر مجبور ہوجائیں گے۔
چیف جسٹس نے یہ بات پاکستانی نژاد برطانوی اراکینِ پارلیمنٹ سے گفتگو میں کہی۔
ان کا کہنا تھا کہ دیا مر بھاشا ڈیم کی تعمیر کے لیے فنڈز کی ضرورت ہے اور بیرونِ ملک مقیم پاکستانی ڈیم فنڈ میں عطیات دینا چاہتے ہیں۔
چیف جسٹس نے برطانوی پارلیمنٹ کا دورہ بھی کیا اور ایوان میں سوالات وجوابات کے سیشن میں شرکت کی، اس موقع پر نظامِ انصاف کی اہمیت پر روشنی ڈالتے ہوئے ان کا کہنا تھا کہ کوئی معاشرہ انصاف کے بغیر نہیں چل سکتا۔
لندن میں پاکستانی ہائی کمیشن کی جانب سے جاری بیان میں بتایا گیا کہ چیف جسٹس پاکستان میاں ثاقب نثار کے اعزاز میں سینٹرل لندن برطانیہ کے وکلا نے استقبالیہ دیا۔
مذکورہ استقبالیے سے خطاب کرتے ہوئے چیف جسٹس نے کہا کہ سمندر پار پاکستانی اپنے ملک کے لیے بہترین کام اور اس کا نام روشن کر رہے ہیں اس کے ساتھ معیشت کو مستحکم کرنے میں بھی اپنا اہم کردار ادا کر رہے ہیں۔
ان کا مزید کہنا تھا کہ پاکستان میں مقیم تمام قوموں کو برابری کی بنیاد پر انصاف فراہم کیا جارہا ہے، یہاں خوشحالی بھی آرہی ہے۔
انہوں نے کہا کہ ’میں کسی ایک قبقے کا نہیں بلکہ پورے پاکستان کا چیف جسٹس ہوں، پاکستان میں انصاف کے تقاضے پورے کیے جارہے ہیں‘۔
واضح رہے کہ چیف جسٹس میاں ثاقب نثار 20 نومبر کو 9 روزہ دورے پر برطانیہ روانہ ہوئے تھے۔
ان کے دورے کا مقصد اپنے بیٹے نجم ثاقب کی گریجویشن کی تقریبِ اسناد میں شرکت اور سپریم کورٹ دیا مربھاشا ڈیم کے لیے فنڈ جمع کرنے کے حوالے سے مہم میں حصہ لینا تھا۔
اس کے ساتھ برطانیہ میں مقیم پاکستانی کمیونٹی سے ملاقاتیں بھی چیف جسٹس کے شیڈول میں شامل ہیں جن کی درخواست پر چیف جسٹس دورہ کر رہے ہیں۔
یاد رہے کہ چیف جسٹس میاں ثاقب نثار اپنے غیر ملکی دورے کے تمام اخراجات اپنی جیب سے ادا کررہے ہیں۔
خیال رہے کہ چیف جسٹس کا دورہ برطانیہ 20 نومبر سے 28 نومبر تک جاری رہے گا، اس دوران وہ برطانیہ کے شہر لندن، مانچسٹر، برمنگھم اور بریڈ فورڈ کے دورے کے دوران ڈیم فنڈ سے متعلق تقریبات میں شرکت کریں گے۔
ان کی غیر موجودگی میں ان کی جگہ جسٹس گلزار احمد قائم مقام چیف جسٹس کے فرائض سرانجام دے رہے ہیں۔
