وفاقی وزیر برائے اطلاعات و نشریات چوہدری فواد حسین نے دعویٰ کیا ہے کہ حکومت نے سرکاری ذرائع ابلاغ عامہ پر عائد سیاسی سینسر شپ کو ختم کردیا ہے۔
انہوں نے کہا کہ پاکستان ٹیلی ویژن (پی ٹی وی) اور ریڈیو پاکستان کو اپنے مواد پر ادارتی خودمختاری حاصل ہوگی اور وہ بغیر کسی سیاسی مداخلت کے اپنی مرضی سے کام کرسکیں گے۔
As per vision of @ImranKhanPTI Ended political censorship on PTV, clear instructions issued for a complete editorial independence on PTV and Radio Pakistan, drastic changes ll be visible in Information Dept in coming 3 months Inshallah
— Ch Fawad Hussain (@fawadchaudhry) August 21, 2018
فواد حسین نے کہا کہ وزیراعظم عمران خان کے وژن پر عمل کرتے ہوئے سرکاری ذرائع ابلاغ عامہ کو مکمل ادارتی آزادی دے دی گئی ہے۔
وزیرا طلاعات نے کہا کہ آئندہ تین ماہ میں محکمہ اطلاعات میں واضح تبدیلیاں نظر آئیں گی۔
عمران خان کے ملک کے 22 ویں وزیراعظم کی حیثیت سے منصب سنبھالنے کے بعد موجودہ حکومت نے اپنے اختیارات کا استعمال شروع کردیا ہے۔
واضح رہے کہ وزیراعظم عمران خان نے وزارت عظمیٰ کا عہدہ سنبھالنے کے بعد 19 اگست کو قوم سے کیے گئے پہلے خطاب میں حکومتی اداروں کو خود مختار، کرپشن اور سیاسی مداخلت سے پاک بنانے کا وعدہ کیا تھا۔