Fri 15 December 2017

پاکستان، چین کا باہمی امور کے شعبوں میں تعاون مضبوط کرنے پر اتفاق

پاکستان، چین کا باہمی امور کے شعبوں میں تعاون فائل فوٹو پاکستان، چین کا باہمی امور کے شعبوں میں تعاون

پاکستان اور چین کے درمیان باہمی امور کے شعبوں میں مزید تعاون کو مضبوط کرنے پر اتفاق کیا گیا ہے۔

دفتر خارجہ سے جاری بیان کے مطابق پاکستان اور چین کے درمیان تزویراتی مذاکرات کا آٹھواں دور ہوا۔

پاکستانی وفد کی قیادت سیکریٹری خارجہ تہمینہ جنجوعہ جبکہ ایشیائی اور قونصل امور کے لیے معاون وزیر خارجہ کونگ یوآن یو نے چینی وفد کی قیادت کی۔

مذاکرات میں فریقین نے دوطرفہ تعلقات کے تمام پہلوؤں کا جامع جائزہ لیا، جس میں ایک خطہ ایک پٹی بالخصوص پاک چین اقتصادی راہداری (سی پیک)، باہمی تجارت، دفاع، انسداد دہشت گردی اور ثقافت، تعلیم اور عوامی روابط کے امور زیر غور آئے۔

دونوں جانب سے باہمی امور کے شعبوں میں مزید تعاون کو مضبوط کرنے پر اتفاق کیا گیا۔

مذاکرات میں سیکریٹری خارجہ اور ان کے چینی ہم منصب نے افغانستان کی علاقائی صورتحال، جنوبی ایشیا میں امریکی پالیسی اور جزیرہ نما کوریا سے متعلق امور پر بھی تبادلہ خیال کیا۔

تہمینہ جنجوعہ نے اپنے ہم منصب کو مقبوضہ جموں و کشمیر کے لوگوں کی سنگین صورتحال اور بھارت کی طرف سے انسانی حقوق کی جاری خلاف ورزیوں کے بارے میں بھی بتایا۔

انہوں نے کشمیر میں انسانی حقوق کی پامالیاں بند کرنے کے لیے بھارت پر زور ڈالنے بین الاقوامی برادری کی جانب سے کردار ادا کیے جانے کی امید ظاہر کی۔

فریقین نے اقوام متحدہ، شنگھائی تعاون تنظیم (ایس سی او) سمیت مختلف فورمز پر تعاون کو مزید فروغ دینے پر اتفاق کیا۔

مذاکرات میں سیاسی، سلامتی اور اقتصادی سمیت دیگر امور پر بھی تعاون کو مضبوط کرنے کے عزم کا اعادہ کیا گیا۔

Leave a comment

Make sure you enter all the required information, indicated by an asterisk (*). HTML code is not allowed.