بے نظیر قتل کیس کا فیصلہ: مشرف اشتہاری قرار، 5 ملزمان بری، 2 کو سزا

 بے نظیر بھٹو فائل فوٹو بے نظیر بھٹو

بے نظیر بھٹو قتل کیس کے فیصلے میں انسداد دہشت گردی راولپنڈی نے سابق صدر جنرل (ر) پرویز مشرف کو اشتہاری قرار دے کر ان کی جائیداد کی قرقی کا حکم جاری کردیا۔

عدالت کے فیصلے میں پانچ گرفتار ملزمان کو بری کردیا گیا جبکہ سابق سی پی او سعود عزیز کو مجموعی طور پر 17 سال اور سابق ایس پی خرم شہزاد کو مجموعی طور پر 17 سال کی سزا سنائی گئی۔

فیصلے کے اہم نکات

رفاقت ، حسنین ، رشید احمد ، شیر زمان اور اعتزاز شاہ کو بری کرنے کا حکم

سابق ایس پی خرم شہزاد کو مجموعی طور 17 سال کی سزا کا حکم

سابق سی پی او سعود عزیز کو مجموعی طور پر 17 سال قید کی سزا

سابق ایس پی خرم شہزاد کو مجموعی طور 17 سال کی سزا کا حکم

راولپنڈی کی انسداد دہشت گردی کی عدالت نے گزشتہ روز بے نظیر بھٹو قتل کیس کی سماعت کے دوران وکلا کے دلائل مکمل ہونے کے بعد کیس کا فیصلہ محفوظ کرلیا تھا۔

انسداد دہشت گردی عدالت کے جج اڈیالہ جیل میں کیس کا فیصلہ سنائیں گے جب کہ عدالت نے 10 سال بعد سماعت مکمل کی۔

فیصلہ محفوظ ہونے کے بعد وفاقی تحقیقاتی ادارے (ایف آئی اے) کے پراسیکیوٹر چوہدری اظہر کا میڈیا سے بات کرتے ہوئے کہنا تھا کہ ہر ملزم کے خلاف مضبوط اور ٹھوس شہادتیں ہیں جب کہ سابق سی سی پی او سعود عزیز سہولت کار ہیں جنہوں نے بے نظیر بھٹو کو سیکیورٹی نہیں دی۔

مزید جانئیے: مارک سیگل نے بے نظیر قتل کیس کا ذمہ دار مشرف کو قرار دیدیا

چوہدری اظہر کے مطابق سابق وزیراعظم کے مقدمہ قتل کے 121 گواہان تھے جن میں سے صرف 68 کے بیانات ریکارڈ کئے گئے جب کہ بے نظیر بھٹو کے ڈرائیور عبدالرحمان کے علاوہ سب سے تفتیش کی گئی۔

پراسیکیوٹر ایف آئی اے نے کہا کہ بے نظیر کے قافلے میں بیک اپ گاڑی میں بابر اعوان اور دیگر لوگ تھے جب کہ بیک اپ گاڑی فرحت اللہ بابر کے کنٹرول میں تھی۔

چوہدری اظہر نے بتایا کہ بے نظیر بھٹو قتل کا مقدمہ 8 بجکر 20 منٹ پر درج ہوا تو مقدمہ درج ہونے سے پہلے تفتیش شروع نہیں ہوتی۔

سابق صدر پرویز مشرف کے حوالے سے ایف آئی اے کے پراسیکیوٹر نے کہا کہ پرویز مشرف کی بیرون ملک روانگی کا معاملہ وفاقی حکومت کا اپنا ہے تاہم پرویز مشرف کی حاضری معاف ہوئی تھی انہیں القاعدہ سے خطرہ تھا لیکن ان کے وکیل پیش ہوتے رہے ہیں۔

یہ بھی پڑھیں: بینظیر قتل کیس: ایس ایس پی طاہر ایوب کی عدالت حاضری پر وارنٹ گرفتاری منسوخ

خیال رہے کہ 27 دسمبر2007ء کو لیاقت باغ میں انتخابی جلسے کے بعد روانگی پر لیاقت باغ چوک میں خود کش حملے کے نتیجے میں بے نظیر بھٹو شہید ہوگئی تھیں جب کہ سانحہ کا مقدمہ تھانہ سٹی پولیس میں درج کیا گیا تھا۔

اس وقت کے صدر مملکت پرویز مشرف پر الزام ہے کہ انہوں نے بے نظیر بھٹو کو مکمل سکیورٹی فراہم نہیں کی جب کہ عدالت انہیں مقدمے میں اشتہاری قرار دے چکی ہے۔

2008ء کے انتخابات کے بعد پیپلز پارٹی برسر اقتدار آئی لیکن اس دوران سابق وزیراعظم کے مقدمہ قتل میں کوئی حوصلہ افزا پیش رفت نہ ہوسکی تھی۔

 

 

 

 

install suchtv android app on google app store