انسدادِ دہشت گردی عدالت راولپنڈی نے عمران خان کی ہمشیرہ علیمہ خان کے خلاف مسلسل عدم پیشی پر ایک بار پھر ناقابلِ ضمانت وارنٹ گرفتاری جاری کر دیے۔ تفصیلات کے مطابق 26 نومبر کے احتجاج سے متعلق مقدمے کی سماعت جج امجد علی شاہ نے کی، جس میں علیمہ خان سمیت 11 ملزمان نامزد ہیں۔
علیمہ خان کے سوا دیگر 10 ملزمان عدالت میں پیش ہوئے، جبکہ استغاثہ کے پانچ گواہان بھی مالِ مقدمہ سمیت پیش کیے گئے۔
عدالت نے علیمہ خان کی غیر حاضری پر تیسری مرتبہ ناقابلِ ضمانت وارنٹ گرفتاری جاری کرتے ہوئے پولیس کو ہدایت دی کہ انہیں گرفتار کر کے 22 اکتوبر کو عدالت میں پیش کیا جائے۔
عدالت نے علیمہ خان کے ضامن عمر شریف کے بھی ناقابلِ ضمانت وارنٹ گرفتاری جاری کر دیے۔
انسداد دہشتگردی عدالت نے علیمہ خان کے ضامن کی جائیداد کی دستاویزات کی تصدیق کیلئے ڈی سی راولپنڈی کو ہدایات جاری کر دیں۔
