وزیراعظم شہباز شریف نے سیلاب متاثرین کی امداد کیلئے امدادی فنڈ قائم کر دیا۔
اس موقع پر وزیراعظم شہباز شریف نے کہا ہے کہ عوام بالخصوص مخیر حضرات سے درد مندانہ اپیل کرتا ہوں کہ سیلاب کی تباہی کا شکار اہل وطن کی دل کھول کر مدد کریں، تاریخی بارشوں نے سیلاب کی صورت قیامت صغریٰ برپا ہے، سیلاب متاثرہ بھائیوں، بہنوں اور بچوں کی مدد کیلئے انصارِ مدینہ والے جذبے سے کرنے کی ضرورت ہے۔
وزیراعظم نے کہا ہے کہ بلوچستان میں غیر معمولی بارشوں کے باعث تباہی ہوئی جبکہ سندھ، خیبرپختونخوا اور پنجاب میں بے تحاشہ نقصانات ہوئے۔
وزیراعظم شہباز شریف کا کہنا تھا کہ ملک کے غیر مستحکم معاشی حالات کے باوجود حکومت نے 5 ارب روپے سیلاب متاثرین کے لئے فوری جاری کردئیے ہیں۔
وزیراعظم نے مزید کہا ہے کہ پاکستان نے 2005 کے زلزلے اور 2010 کے ملک کے سب سے بڑے سیلاب کے وقت متاثرین کی دل کھول کر مدد کرکے پوری دنیا میں ایک مثال قائم کی تھی، آج بھی اہل وطن کو یہی جذبہ درکار ہے۔
دوسری جانب سیلاب زدگان کے لئے رقوم پرائم منسٹرئ ریلیف فنڈ 2022 کے اکاؤنٹ نمبر ‘جی-12164′ میں جمع کرائی جاسکتی ہیں جبکہ سیلاب سے متاثرہ علاقوں میں ایمرجنسی نافذ کردی گئی ہے۔
انہوں نے کہا کہ صوبائی حکومتوں سے بھی گزارش کی ہے کہ متاثرہ علاقوں کو آفت زدہ قرار دیں تاکہ امدادی کاموں کو مزید تیز کیا جاسکے۔
