پاکستان پیپلزپارٹی کی مرکزی رہنما شازیہ مری نے دعویٰ کیا ہے کہ عمران خان کو اپوزیشن کی ضرورت نہیں ہے کیونکہ ان کی اپنی صفوں میں ایسے لوگ بیٹھے ہیں جو خود اسے گرانا چاہتے ہیں۔
پی پی کی رکن قومی اسمبلی شازیہ مری نے حکومت پر کڑی نکتہ چینی کرتے ہوئے کہا کہ دن بدن ہر شعبے میں ملکی معاملات خراب سے خراب تر ہوتے جا رہے ہیں۔
سندھ کی سابق صوبائی وزیر شازیہ مری نے استفسار کیا کہ کیا ہمارے پاس کام ختم ہو گئے ہیں جو ہم ایک نوٹیفکیشن کے پیچھے پڑے ہوئے ہیں؟
پی پی کی مرکزی رہنما نے سخت تنقید کرتے ہوئے کہا کہ صدر کا آفس صرف ایک آرڈیننس فیکٹری بن کر رہ گیا ہے۔ انہوں نے کہا کہ صدر کا کام صرف آرڈیننس پر دستخط کرنا ہی رہ گیا ہے۔
شازیہ مری نے الزام عائد کیا کہ سینیٹ و قومی اسمبلی کے اجلاسوں کو منصوبہ بندی کے تحت ملتوی کر کے آرڈیننس جاری کر دیے جاتے ہیں۔
پی پی رہنما نے کہا کہ عمران خان کو کیا تحائف ملے ہیں؟ قوم یہ جاننا چاہتی ہے۔ انہوں نے کہا کہ تحائف کی باقاعدہ انٹری ہوتی ہے۔
شازیہ مری نے کہا کہ عمران خان قوانین سے بالاتر نہیں ہیں۔ انہوں نے کہا کہ الیکشن کمیشن پر بھی انہیں اعتراض ہوا ہے اور ان کے قول و فعل میں تضاد ہے۔
پی پی رہنما و رکن قومی اسمبلی شازیہ مری نے کہا کہ چیئرمین پی پی بلاول بھٹو نے ہمیشہ کہا ہے کہ پاکستان کا وزیراعظم الیکٹڈ ہونا چاہیے۔
