وزیراعظم عمران خان نے اعلان کیا ہے کہ محسن پاکستان ڈاکٹر عبدالقدیر خان کی تدفین ان کی خواہش کے مطابق فیصل مسجد کے احاطے میں کی جائے گی۔
معروف جوہری سائنسدان طویل علالت کے باعث اتوار کی صبح وفات پاگئے تھے، ان کی عمر 85 برس تھی۔
اپنے پیغام میں وزیر اعظم نے کہا کہ ڈاکٹر عبدالقدیر خان کی وفات سے بہت دکھ ہوا، ملک کو جوہری ریاست بنانے میں ان کی گراں قدر خدمات کے سبب پوری قوم ان سے محبت کرتی تھی۔
He will be buried in Faisal Mosque as per his wishes. My condolences & prayers go to his family.
— Imran Khan (@ImranKhanPTI) October 10, 2021
نماز جنازہ اور تدفین سے متعلق معاملات کے بارے میں وزیر داخلہ شیخ رشید احمد نے بتایا کہ ڈاکٹر عبدالقدیر خان کی تدفین مکمل سرکاری اعزاز کے ساتھ کی جائے گی۔
ایک ٹوئٹر پیغام میں انہوں نے بتایا کہ وزارت داخلہ نے دوپہر 12 بجے کیپٹل ڈیولپمنٹ اتھارٹی (سی ڈی اے) کے ہیڈ کوارٹر میں ایک اجلاس طلب کیا ہے۔
انہوں نے کہا کہ محسن پاکستان کی نماز جنازہ ساڑھے 3 بجے فیصل مسجد میں اداکی جائے گی اور اجلاس میں نماز جنازہ کے انتظامات کو حتمی شکل دی جائے گی۔