دہشت گردی کے خاتمے کے قومی عزم کو کمزور نہیں کیا جاسکتا: وزیراعلیٰ بلوچستان

وزیراعلیٰ بلوچستان جام کمال خان فائل فوٹو وزیراعلیٰ بلوچستان جام کمال خان

وزیراعلیٰ بلوچستان جام کمال خان نے کوئٹہ میں ہونے والے بم دھماکے کی شدید الفاظ میں مذمت کرتے ہوئے دھماکے میں قیمتی جانی نقصان پر دلی دکھ اور افسوس کا اظہار کیا۔

تفصیلات کے مطابق صوبائی کابینہ کے اجلاس کے دوران دہشت گرد عناصر اور ان کے سرپرستوں کو کیفر کردار تک پہنچانے کے عزم کا اظہار کرتے ہوئے جام کمال کا کہنا تھا کہ دہشت گردی کے خاتمے کے قومی عزم کو کمزور نہیں کیا جاسکتا۔

انہوں نے کہ امن کے قیام کے لیے سیکیورٹی اداروں کی کاوشوں اور قربانیوں کو رائیگاں نہیں جانے دیا جائے گا اور عوام کی حمایت اور تعاون سے دہشت گردوں کے مذموم مقاصد کو ہر صورت ناکام بنایا جائے گا۔

وزیراعلیٰ اور صوبائی کابینہ کی جانب سے دھماکے کے شہداء کے لواحقین سے تعزیت اور ہمدردی کا اظہار کرتے ہوئے شہداء کے درجات کی بلندی اور لواحقین کے لئے صبر جمیل کی دعا کی گئی۔

وزیراعلیٰ نے پولیس اور سیکیورٹی اداروں کو شہر میں حفاظتی اقدامات کو مزید موثر بنانے اور محکمہ صحت کو اسپتالوں میں ایمرجنسی نافذ کرتے ہوئے زخمیوں کو علاج معالجہ کی بہترین سہولتوں کی فراہمی کی ہدایت کی ہے۔

install suchtv android app on google app store