کوئٹہ کے علاقے کلی الماس میں گزشتہ شب دہشتگردوں کیخلاف آپریشن میں زخمی ہونے والا ہیڈ کانسٹیبل شہید ہوگیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ہیڈ کانسٹبیل ثناء اللہ گزشتہ رات دہشت گردوں کے خلاف کارروائی میں زخمی ہواتھا جو آج دم توڑ گیا۔
آئی ایس پی آر کے مطابق شہید ہیڈ کانسٹیبل نے پسماندگان میں ایک بیوہ اور 2 بچے چھوڑے۔
پاک فوج کے بیان میں شہید ہیڈ کانسٹیبل ثناء اللہ کو خراج تحسین پیش کرتے ہوئے کہا گیا ہے کہ امن کی طرف ہمارا سفر پاکستان کے شہداء کی مرہون منت ہے اور آج ہم امن کے جس ماحول میں رہ رہے ہیں اس کے پیچھے شہداء کی قربانیاں ہیں، ہم شہداء کی قربانیوں کو سلام پیش کرتے ہیں۔
Head Constable Sanaullah who got injured last night during IBO at Almaskili, Quetta succumbed to injuries, embraced shahadat. Left behind a widow & 2 kids. We owe our ‘journey to peace’ to all our Pakistani martyrs. You are behind peace we live in. Salute to your sacrifices. pic.twitter.com/VKcd7GeMOJ
— Maj Gen Asif Ghafoor (@OfficialDGISPR) May 17, 2018
خیال رہے آپریشن ردالفساد کے تحت سیکیورٹی فورسز نے بلوچستان کے علاقے کلی الماس میں آپریشن کیا تھا جس کے نتیجے میں لشکر جھنگوی بلوچستان کے سربراہ سمیت تین دہشت گرد ہلاک ہوئے تھے۔
فائرنگ کے تبادلے میں کرنل سہیل عابد شہید ہوگئے تھے جنہیں مکمل فوجی اعزاز کے ساتھ سپرد خاک کردیا گیا ہے۔
آپریشن کے دوران لشکر جھنگوی بلوچستان کا سربراہ سلمان بدینی ہلاک ہوگیا تھا جبکہ دو خودکش بمبار بھی آپریشن میں مارے گئے تھے۔
سیکیورٹی فورسز کی اس کارروائی کے رد عمل میں دہشتگردوں نے کوئٹہ کے علاقے چمن ہاؤسنگ اسکیم کے قریب واقع ایف سی مددگار سینٹر پر حملہ کیا جسے ناکام بنادیا گیا اور 5 حملہ آوروں کو ہلاک کردیا گیا۔
