بلوچستان میں پہلا پولیو کیس رپورٹ

رواں سال کے دوران ملک کا تیسرا پولیو جبکہ بلوچستان میں پہلا پولیو کیس کوئٹہ میں سامنے آ گیا۔ پولیو ایمرجنسی سیل میں ذرائع نے بتایا کہ کوئٹہ کے تقریباً ڈھائی سالہ محمد اکرم میں پولیو وائرس پایا گیا۔

سیل کے سربراہ ڈاکٹر سید سیف الرحمان نے بتایا کہ رپورٹ ہونے والے اس پولیو کیس کی وجہ والدین کا متاثرہ بچے کو ویکسین پلانے سے انکار ہے۔

سیف الرحمان کے مطابق صوبے میں پولیو قطرے نہ پلانے والے والدین کی تعداد میں 90 فیصد کمی آئی ہے۔

ان کا کہنا تھا کہ حال ہی میں چلائی گئی پولیو مہم میں سب سے بڑے صوبے کے 15 اضلاع میں پندرہ لاکھ بچوں کو ویکسین دی گئی۔

پاکستان ڈیمو گرافک ہیلتھ سروے کی حالیہ رپورٹ میں بتایا گیا کہ گزشتہ مہینے صوبے میں چلائی گئی پولیو مہم کے دوران انکار کے 2821 کیس سامنے آئے تھے۔

یاد رہے کہ 2016 میں سامنے آنے والا تیسرا ایسا کیس ہے۔ 6 فروری کو کراچی کے تقریباً تین سالہ پختون بچے میں اس وائرس کی تصدیق ہوئی تھی۔

اس کے بعد دوسرا کیس خیبر پختونخوا کے ضلع نوشہرہ میں انیس مہینے کے عبداللہ جہاد خان کی صورت میں سامنے آیا۔

subscribe YT Channel install suchtv android app on google app store