بلوچستان کے ضلع مستونگ میں کوئٹہ کراچی شاہراہ پر دہشت گردوں نے مسافر گاڑیوں پر فائرنگ کر دی، جس کے نتیجے میں ایک کمسن بچہ جاں بحق جبکہ آٹھ افراد زخمی ہو گئے۔
عینی شاہدین کے مطابق حملے کے دوران دہشت گردوں نے اندھا دھند فائرنگ کی اور تین گاڑیوں کو آگ لگا دی۔ علاقے میں یکے بعد دیگرے دھماکوں کی آوازیں بھی سنائی دیں، جس سے شدید خوف و ہراس پھیل گیا۔
زخمیوں کو فوری طور پر قریبی اسپتال منتقل کر دیا گیا ہے، جبکہ سیکیورٹی فورسز نے جائے وقوعہ کو گھیرے میں لے کر سرچ آپریشن شروع کر دیا ہے۔
حکام کے مطابق واقعے کی تحقیقات جاری ہیں اور حملہ آوروں کی تلاش کے لیے مختلف ٹیمیں روانہ کر دی گئی ہیں۔
زخمیوں کو فوری طور پر شہید نواب غوث بخش اسپتال مستونگ منتقل کر دیا گیا ہے جہاں ان کا علاج جاری ہے۔ اسپتال ذرائع کے مطابق بعض زخمیوں کی حالت تشویشناک ہے۔
ذرائع کا کہنا ہے کہ دہشت گردوں نے قریبی دفاتر میں گھس کر سرکاری ریکارڈ کو بھی نذر آتش کر دیا۔ واقعے کے بعد سیکیورٹی فورسز نے علاقے کو گھیرے میں لے لیا ہے اور سرچ آپریشن شروع کر دیا گیا ہے۔
