نامور اداکار محسن عباس حیدر کی بڑی اسکرین پر واپسی، مداحوں کے نام پیغام جاری

 محسن عباس حیدر نے اپنے کیریئر کی چھٹی فلم سائن کرلی فائل فوٹو محسن عباس حیدر نے اپنے کیریئر کی چھٹی فلم سائن کرلی

پاکستان کے نامور اداکار و گلوکار محسن عباس حیدر نے سابقہ اہلیہ فاطمہ سہیل سے خلع کے بعد اپنے کیریئر کی چھٹی فلم سائن کرلی ہے۔

محسن عباس حیدر کی نئی فلم کا نام ’ونس اپون اے ٹائم ان کراچی‘ ہے جس میں ان کے ہمراہ اداکارہ نوشین شاہ کام کرتی نظر آئیں گی۔

اداکار نے ایک پوسٹ کے ذریعے اپنے انسٹاگرام اکاؤنٹ پر خود اس خبر کو مداحوں کے ساتھ شیئر بھی کیا۔

اس فلم کی ہدایات ابو علیحہ دیں گے جبکہ اس کی کہانی علی موئن نے تحریر کی ہے۔

خیال رہے کہ سابق اہلیہ فاطمہ سہیل نے گزشتہ سال جولائی میں محسن عباس پر جنسی تشدد کرنے اور دھوکہ دینے کا الزام عائد کیا تھا، جس کے بعد محسن عباس کے کیریئر کو بھی کافی نقصان پہنچا تھا۔

جہاں شوبز انڈسٹری سے تعلق رکھنے والی شخصیات نے انہیں شدید تنقید کا نشانہ بنایا تھا وہیں نجی ٹی وی چینل پر شو 'مذاق رات' سے بھی انہیں ہاتھ دھونا پڑا جبکہ ان الزامات کے بعد وہ کسی پروجیکٹ میں کام کرتے ہوئے بھی نظر نہیں آئے تھے۔

تاہم اداکار و گلوکار نے حال ہی میں اپنا گانا ’روح‘ بھی سوشل میڈیا پر ریلیز کیا تھا جسے ملا جلا ردعمل موصول ہوا تھا۔

فاطمہ سہیل نے فیس بک پر ایک پوسٹ کے ذریعے محسن عباس حیدر پر جنسی تشدد کرنے اور شادی شدہ ہونے کے باوجود نازش جہانگیر نامی ماڈل سے تعلقات رکھنے کا الزام لگایا تھا اور محسن کے خلاف مقدمہ لڑنے کا اعلان کیا تھا۔

بعدازاں فاطمہ سہیل نے محسن عباس سے خلع لینے کا فیصلہ کرتے ہوئے لاہور کے فیملی کورٹ میں درخواست دائر کی تھی۔

جس کے بعد گزشتہ سال ستمبر میں لاہور کی فیملی کورٹ نے محسن عباس حیدر اور فاطمہ سہیل کو خلع کی ڈگری جاری کردی تھی۔

subscribe YT Channel install suchtv android app on google app store