کوریا میں موجود نارویجن اولمپک ٹیم کا کہنا ہے کہ وہ 1500 انڈوں کا آرڈر دینا چاہتے تھے لیکن شاید گوگل نے ترجمہ کرتے ہوئے اسے 15,000 میں تبدیل کر دیا۔
نارویجن اولمپک ٹیم کے ترجمان ہالور لی نے بی بی سی کو بتایا کہ "جب ٹرک کھولے گئے تو انہوں نے اس پر سے انڈے اتارنے شروع کیے۔
تھوڑی دیر بعد انہوں (باورچیوں) نے سوچا کہ بہت دیر ہوگئی ہے لیکن یہ ختم ہونے کا نام ہی نہیں لے رہے۔
انہوں نے آپس میں کہا کہ یہ گوگل سے ترجمے میں غلطی ہوئی ہے۔ میں نہیں جانتا۔"
انڈوں سے ٹرک کے بھرے ہونے کے باوجود ٹیم کا باورچی 13,500انڈے دوکان والے کو واپس کر سکتا تھا۔
لیکن ترجمے کی یہ غلطی مکمل طور پر گوگل کا قصور نہیں ہو سکتی ۔
دی گارڈین کے مطابق ریسٹورینٹس کے لیے یہ عام بات ہے کہ وہ 30 انڈوں کے کریٹس میں انڈے خریدتے ہیں اور کورین میں صرف ایک حرف کی تبدیلی سے "15,00" کا عدد "15,000" میں بدل جاتا ہے۔