پاکستان کی معروف صحافی اور اینکر پرسن فرح یوسف نے حال ہی میں اپنے شوہر اقرار الحسن سے علیحدگی کی خبروں پر پہلی بار وضاحت پیش کی ہے۔ سوشل میڈیا پر کئی دنوں سے دونوں کے تعلقات کے خاتمے کی افواہیں گردش کر رہی تھیں، جنہیں فرح نے مسترد کر دیا ہے۔
پوڈکاسٹ ”زاویہ“ میں گفتگو کے دوران فرح نے بتایا کہ ایک مداح نے ان سے سوشل میڈیا پر سوال کیا کہ کیا وہ اقرار الحسن سے علیحدہ ہو چکی ہیں، کیونکہ ان کے اکاؤنٹس پر نام ”فرح یوسف“ نظر آ رہا تھا۔
اس پر فرح نے وضاحت دی کہ ’بہت سے لوگ مجھے میرے والد کے نام سے جانتے ہیں اور میں اس پر فخر کرتی ہوں۔
میرے نام کے آگے یوسف میرے والد کی پہچان ہے اور باپ کے رشتے سے زیادہ قیمتی کوئی رشتہ نہیں۔ کبھی کبھی میں سوچتی ہوں کہ اپنی بایو میں ’فرح اقرار‘ کے بجائے دوبارہ ’فرح یوسف‘ لکھ دوں۔‘
انہوں نے مزید کہا کہ کچھ پرانے سوشل میڈیا اکاؤنٹس کی تصدیق (ویری فکیشن) کی وجہ سے نام تبدیل کرنا ممکن نہیں، اس لیے وہاں پرانے نام موجود ہیں۔
فرح یوسف نے تمام افواہوں کو رد کرتے ہوئے کہا کہ ’ہمارے درمیان کوئی علیحدگی نہیں ہوئی، لوگ اپنی مرضی سے خبریں بنا لیتے ہیں۔ دونوں نام میرے لیے محترم ہیں اور میں انہیں اپنا سمجھتی ہوں۔‘
انہوں نے اس موقع پر مداحوں سے اپیل کی کہ وہ غیر مصدقہ خبروں پر یقین نہ کریں۔
یاد رہے کہ فرح یوسف نے اپنے صحافتی کیریئر کا آغاز 2007 میں ایک نجی ٹی وی چینل سے کیا تھا اور اب اپنا ذاتی یوٹیوب چینل کامیابی سے چلا رہی ہیں۔ وہ اقرار الحسن کی دوسری اہلیہ ہیں، جبکہ اقرار الحسن کی تین شادیاں ہوچکی ہیں۔
