لاہور سمیت پنجاب کے مختلف شہروں میں طوفانی بارشیں

لاہور میں آج صبح تیز ہواؤں کے ساتھ ہونے والی بارش کے باعث نشیبی علاقے زیر آب آگئے ہیں جس کی وجہ سے لوگوں کو شدید مشکلات کا سامنا ہے۔

طوفانی بارش کے باعث لاہور میں بجلی کے 150 فیڈر ٹرپ ہونے سے شہر کا 60 فیصد حصہ بجلی سے محروم ہو گیا جب کہ لاہور ایئرپورٹ پر فلائٹ آپریشن بھی بری طرح متاثر ہوا ہے، موسم کی خرابی کے باعث علامہ اقبال انٹر نیشنل ایئر پورٹ سے اندرون و بیرون ملک جانے والی متعدد پروازیں منسوخ کردی گئی ہیں جس کے باعث 2 ہزار سے زائد مسافر ایئرپورٹ پر پھنس کر رہ گئے ہیں، لاہور میں بارش کے باعث مختلف حادثات میں 2 افراد جاں بحق جب کہ صوفیہ آباد میں مکان کی چھت گرنے سے 2 افراد زخمی بھی ہوئے۔

وزیراعلیٰ پنجاب وزیراعلیٰ شہباز شریف نے بارش کے باعث نشیبی علاقوں میں پانی جمع ہونے کا نوٹس لیتے ہوتے متعلقہ حکام کو فوری طور پر پانی نکالنے کا حکم دیا ہے، دوسری جانب سی پی او لاہور کیپٹن عثمان نے شہریوں کو بجلی کے پولز سے دور رہنے کی ہدایت کرتے ہوئے بغیر ضرورت کے گھر سے باہر نہ نکلنے کی تلقین کی ہے۔

گوجرانوالا میں بھی موسلادھار بارش سے گیپکو ریجن میں 100 سے زائد فیڈرز ٹرپ کر گئے جس کے باعث متعدد علاقوں کی بجلی غائب ہو گئی، اس کے علاوہ شیخوپورہ میں بھی طوفانی بارش کے باعث نشیبی علاقے زیر آب آ گئے، اسلام آباد، راولپنڈی، جھنگ، چیچہ وطنی، ساہیوال، جہلم اور اٹک میں بھی تیز ہواؤں کے ساتھ بارش سے گرمی کا زور ٹوٹ گیا۔

محکمہ موسمیات نے آج اسلام آباد، راولپنڈی، لاہور اور گوجرانوالا سمیت پنجاب کے متعدد شہروں، خیبرپختونخوا اور کشمیر کے اکثر علاقوں میں مزید بارشوں کی پیش گوئی کی ہے، سکھر، لاڑکانہ ڈویژن، ڈی جی خان، کوئٹہ ژوب، سبی، نصیر آباد اور گلگت بلتستان میں بھی چند مقامات پر تیز ہواوٴں کے ساتھ بارش کا امکان ہے۔

ڈی جی میٹ غلام رسول کا کہنا ہے کہ گلوبل وارمنگ کے باعث درجہ حرارت تیزی سے تبدیل ہو رہا ہے، شدید گرمی سے گلیشئرز پگھلنے میں تیزی آئی ہے، رواں برس شدید بارشوں کے باعث سیلاب کا خدشہ ہے تاہم ممکنہ سیلاب سے نمٹنے کے لئے متعلقہ اداروں سے رابطے میں ہیں، ان کا کہنا تھا کہ مون سون بارشوں کا باقاعدہ سلسلہ 27 جون سے شروع ہوگا جو ستمبر تک جاری رہے گا جب کہ آئندہ برسوں میں ہمیں موسمیاتی چیلنجز کا سامنا کرنا پڑے گا، کراچی میں بھی رواں برس 25 سے 30 فیصد زیادہ بارش ہونے کا امکان ہے۔