آئیں مل کر تفتیش کرتے ہیں، شمالی کوریا کی تجویز

سونی پکچرز پر سائبر حملے کے حوالے سے شمالی کوریا نے امریکا کو مشترکہ تفتیش کی تجویز پیش کی ہے۔ امریکا نے اس حملے کے لیے پیونگ یانگ حکومت کو ذمہ دار قرار دیا ہے۔

سونی پکچرز پر سائبر حملے کے لیے امریکی الزام کے ردِ عمل میں شمالی کوریا نے اسے ایک ’بہتان‘ قرار دیا ہے۔ یہ تنازعہ فلمساز ادارے سونی کی پیش کردہ فلم ’دی انٹرویو‘ سے متعلق ہے جو کرسمس کے روز ریلیز کی جانی تھی۔ تاہم اس کمپنی پر ہیکرز کے حملے سے فلم کی ریلیز کھٹائی میں پڑ گئی ہے۔

اس فلم میں دراصل شمالی کوریا کے رہنما کِم جونگ اُن کے قتل کے منصوبے کو کہانی بنایا گیا ہے۔ خبر رساں ادارے اے ایف پی کے مطابق پیونگ یانگ میں وزارتِ خارجہ کے ایک ترجمان کا کہنا ہے: ’’جیسے امریکا ہم پر بے بنیاد الزامات اور بہتان لگا رہا ہے، ہماری تجویز ہے کہ اس معاملے کی مشترکہ تفتیش کی جائے۔‘‘

اس ترجمان کا یہ بیان کورین سینٹرل نیوز ایجنسی (کے سی این اے) نے جاری کیا ہے جس میں انہوں نے مزید کہا ہے کہ پیونگ یانگ حکومت اس سائبر حملے میں ملوث نہیں اور وہ یہ بات ثابت کر سکتے ہیں۔

شمالی کوریا نے خبردار کیا ہے کہ مشترکہ تفتیش کے لیے اس کی تجویز مسترد کی گئی تو امریکا کو ’نتائج بھگتنے‘ پڑیں گے۔

قبل ازیں امریکی صدر باراک اوباما نے کہا تھا کہ واشنگٹن انتظامیہ ’کسی آمر‘ کے سامنے گھٹنے نہیں ٹیکے گی۔ ان کا کہنا تھا: ’’ہم اس بات کی تصدیق کر سکتے ہیں کہ شمالی کوریا اس حملے میں ملوث ہے۔‘‘

امریکی صدر کا یہ بھی کہنا تھا کہ اس حملے کا جواب دیا جائے گا۔ انہوں نے سونی پکچرز کو درپیش اس صورتِ حال پر افسوس کا اظہار بھی کیا، لیکن ساتھ ہی یہ بھی کہا کہ اس کمپنی نے فلم کی ریلیز روک کر غلطی کی ہے۔

تاہم سونی نے اپنے اس فیصلے کا دفاع کیا ہے۔ قبل ازیں امریکی تفتیشی ادارے ایف بی آئی کا کہنا تھا کہ ہیکروں نے سونی کے اسٹوڈیوکو نشانہ بناتے ہوئے اس کے ہزاروں کمپیوٹروں کو ناکارہ بنایا جس کے نتیجے میں کمپنی نے اپنا پورا نیٹ ورک بند کر دیا۔

ایف بی آئی کا مزید کہنا تھا کہ اس حملے میں استعمال کیے گئے سافٹ ویئرز کا جائزہ لینے کے بعد پتہ چلا ہے کہ یہ ’شمالی کوریا کے عناصر‘ نے بنائے ہیں۔

اُدھر چین کے سرکاری اخبار گلوبل ٹائمز نے ہفتے کو اپنے اداریے میں اس فلم ’دی انٹرویو‘ کو شدید تنقید کا نشانہ بنایا ہے۔ اس اخبار نے فلم کو ’بے تُکی ثقافتی تحقیر‘ قرار دیا ہے۔

install suchtv android app on google app store