انگلش کوچ، ثقلین سے دوبارہ معاہدے کے خواہش مند

انگلینڈ اینڈ ویلز کرکٹ بورڈ نے دوسرا کے موجد ثقلین مشتاق کی خدمات ابتدائی طور پراولڈ ٹریفورڈ میں دوسرے ٹیسٹ کے لیے حاصل کی تھیں۔

انگلینڈ ٹیم رواں سال طے شدہ شیڈول کے مطابق بنگلہ دیش اور ہندوستان کا دورہ کرے گی اور بیلس بورڈ کے ڈائریکٹر کرکٹ اینڈریو اسٹراس سے مذکورہ دوروں کے لیے اسپن باؤلنگ کو زیادہ کارآمد بنانے کے لیے ثقلین مشتاق سے معاہدے پر بات کریں گے۔

گارجین کی رپورٹ کے مطابق بیلس کا کہنا تھا کہ 'معین علی اور عادل رشید دونوں ان کے ساتھ کام کرتے ہوئے لطف اندوز ہورہے ہیں اور اس کے نتائج بھی مثبت آئے ہیں اور ہماری نظریں ان سے دوبادہ فائدہ اٹھانے پر مرکوز ہوں گی'۔

معین علی نے پاکستان کے خلاف دوسرے ٹیسٹ میچ میں بہترین باؤلنگ کا مظاہرہ کرتے ہوئے 5 وکٹیں حاصل کی تھیں تاہم عادل رشید میچ کا حصہ نہیں تھے۔

انگلش ٹیم کے ہیڈ کوچ بیلس، معین علی کی باؤلنگ میں بہتری کو دیکتھے ہوئے ثقلین مشتاق کی خدمات ہندوستان اور بنگلہ دیش کے دورے کے لیے بھی حاصل کرنا چاہتے ہیں جہاں اسپنر مرکزی کردار ادا کرتے ہیں۔

ان کا کہنا تھا کہ 'بہت زیادہ اسپیشلسٹ کوچز ضروری نہیں ہوتے، مجھے یقین ہے کہ انھوں نے ایک یا دو ایسی چیزیں بتائی ہیں جو زیادہ اہم تھی اسی لیے ہم سمجھتے ہیں کہ معین اور عادل دونوں کو بین الاقوامی کرکٹ میں بہتری کی ضرورت ہے'۔

ثقلین مشتاق نے 1995 سے 2004 تک پاکستان کرکٹ ٹیم کی نمائندگی اور بین الاقوامی طورپر 496 وکٹیں حاصل کیں۔

ثقلین نے اپنا آخری ٹیسٹ میچ 2004 میں ہندوستان کے خلاف کھیلا تھا جب وریندرسہواگ نے 309 رنز کی یادگار اننگز کھیلی تھی جبکہ ہندوستان نے اس میچ میں ایک اننگز اور 52 رنز سے کامیابی حاصل کی تھی۔