پاک فوج اور آپریشن ضرب عضب کے دوران شمالی وزیرستان کے آئی ڈی پیز کے درمیان بنوں میں کھیلا گیا نمائشی کرکٹ میچ آفریدی الیون نے جیت لیا۔
پاک فوج کے زیر اہتمام بنوں کے بکا خیل کیمپ میں آئی ڈی پیز کی امداد کے لیے آئی ڈی پیز الیون اور آفریدی الیون کے درمیان ایک نمائشی کرکٹ میچ منعقد کیا گیا، جس میں بوم بوم آفریدی خصوصی طور پر شریک ہوئے۔
دس دس اوور کے اس نمائشی کرکٹ میچ میں ایک ٹیم کی قیادت شاہد آفریدی جبکہ دوسری ٹیم کی قیادت آرمی کے کرنل اظہر نے کی ۔
شاہد آفریدی نے 45 رنز بنائے اور پویلین لوٹ گئے۔
ڈی جی آئی ایس پی آر میجر جنرل عاصم باجوہ بھی آئی ڈی پیز کیمپ میں کھلاڑیوں کی حوصلہ افزائی کے لیے موجود تھے۔
پاک فوج کے ترجمان میجر جنرل عاصم سلیم باجوہ نے اس موقع پر کہا کہ قوم نے فیصلہ کرلیا ہے کہ دہشت گردی کے کینسر کو جڑ سے اکھاڑ پھینکنا ہے۔
اُن کا کہنا تھا کہ آئی ڈی پیز بچوں کی دیرینہ خواہش پر شاہد آفریدی کو کھیلنے کے لیے مدعو کیا گیا۔
اس موقع پر تماشائیوں کا جوش وخروش بھی قابل دید تھا، جنھوں نے کھلاڑیوں کے ہر اسٹروک پر انہیں بھرپور داد دی۔
