پاک فوج کے سربراہ جنرل قمر جاوید باجوہ نے کہا ہے کہ قوم کی حمایت سے پرامن پاکستان کی طرف بڑھ رہے ہیں۔
پاک فوج کے شعبہ تعلقات عامہ آئی ایس پی آر کی جانب سے جاری کردہ بیان کے مطابق آرمی چیف جنرل قمرجاوید باجوہ نے خیبرایجنسی کی وادی راجگل کا دورہ کیا۔ کورکمانڈر پشاور لیفٹیننٹ جنرل نذیر احمد بٹ اور آئی جی ایف سی میجرجنرل شاہین مظہر محمود بھی آرمی چیف کے ہمراہ تھے۔
اس موقع پر انہیں آپریشن خیبر4 کی پیش رفت پر تفصیلی بریفنگ دی گئی۔ جس میں بتایا گیا کہ دہشت گردوں سے 90 فیصد سے زائد علاقہ کلیئر کرا لیا گیا ہے۔
اس موقع پر جنرل قمر جاوید باجوہ نے دہشت گردوں کے خلاف کامیابیاں حاصل کرنے پر آرمی چیف نے پاک فوج اور فضائیہ کی تعریف کی، دہشتگردوں کےٹھکانوں کومہارت سے نشانہ بنانے پر جوانوں کوسراہا۔
"We are heading towards a normalised Pak where writ of state and supremacy of law would be second to none" COAS. (2/2). pic.twitter.com/3PoegljuCg
— Maj Gen Asif Ghafoor (@OfficialDGISPR) August 5, 2017
انہوں نے کہا کہ ہم ملک میں دہشتگردی اور انتہا پسندی کے خلاف کامیابیوں پر قوم کی توقعات پر پورا اترے ہیں۔ اللہ کا شکر ہے کہ جس نے پاک فوج کو قوم کی توقعات پر پورا اترنے کے قابل کیا۔
سربراہ پاک فوج کا کہنا تھا کہ دہشت گردوں کے کئی ٹھکانے تباہ کردیئے گئے ہیں، خیبر ایجنسی کو جلد دہشت گردوں سے پاک کرادیں گے، ہم ایک پرامن پاکستان کی طرف گامزن ہیں۔
پرامن پاکستان میں ریاست کی عملداری اور قانون کی بالا دستی سب سےاوپر ہوگی اور ہر پاکستانی ملک کی ترقی و خوشحالی میں اپنا مثبت کردار ادا کرے گا۔