ماں بننے کے بعد کرینا کپور کی پہلی فلم کی شوٹنگ کا آغاز

کرینہ کپور نے ماں بننے کے 9 ماہ بعد فلم ’ویرے دی ویڈنگ‘ کی شوٹنگ کا آغاز کردیا، اس فلم میں ان کے ساتھ سونم کپور، سوارا بھاسکر اور شیکھا تلشانیہ بھی کام کرتی نظر آئیں گی۔

ویرے دی ویڈنگ کو سونم کپور کی بہن ریہا کپور پروڈیوسر کریں گی، اس کامیڈی رومانوی فلم کی ہدایات ششانکا گھوش دیں گے، جو اس سے قبل سونم کپور کی 2014 کی فلم خوبصورت کی ہدایات دے چکے ہیں۔

ابتدائی طور پر فلم کی شوٹنگ کا آغاز ہندوستان سے کیا گیا، جب کہ فلم کی شوٹنگ یورپ میں بھی کی جائے گی، فلم کی کہانی بھارت سے یورپ سفر، شادی، کامیڈی اور رومانس کے ارد گرد گھومتی ہے۔

فلم میں 2 سے زائد جوڑے کام کریں گے، فوری طور پر فلم کی ریلیز کی تاریخ کا اعلان نہیں کیا گیا۔

اس سے قبل گزشتہ ماہ 22 اگست کو فلم کی کاسٹ کا اعلان کیا گیا تھا، اس موقع پر کرینہ کپور نے سونم کپور اور فلم کی دیگر کاسٹ اور پروڈیوسر کے ساتھ تصویر بھی سوشل میڈیا پر شیئر کی تھی۔

خیال رہے کہ کرینہ کپور کے ہاں دسمبر 2016 میں بیٹے تیمور علی خان کی پیدائش ہوئی تھی، جس کے بعد وہ قریبا 9 ماہ تک فلمی دنیا سے دور تھیں۔

اس دوران کرینہ کپور سے متعلق میڈیا پر مختلف خبریں گردش کرتی رہیں، خبریں تھیں کہ بیبو پر فلمی دنیا میں واپسی کے لیے ان پر خود کو جسمانی طور پر فٹ رکھنے کا دباؤ ہے، اس دوران کرینہ کپور کو ایکسرسائیز کے لیے فٹنیس کلبز میں بھی دیکھا گیا۔

کرینہ کپور اور سیف علی خان کی شادی 2012 میں ہوئی تھی، شادی کے بعد بھی بیبو نے متعدد کامیاب فلمیں دیں، جب کہ دوران حمل بھی انہوں نے نہ صرف ’کی اینڈ کا‘ جیسی فلموں میں کام کیا، بلکہ متعدد اشتہارات اور شوز میں بھی شرکت کرتی رہیں۔

اب ماں بننے کے 9 ماہ بعد انہوں نے فلم ’ویرے دی ویڈنگ‘ کی شوٹنگ کا آغاز کردیا، جس کی تصاویر انہوں نے انسٹاگرام پر بھی شیئر کیں۔